Konflikt interesi në Tetovë: Ambientet publike të komunës për tubim politik

Kryetari aktual i Komunës së Tetovës dhe njëherësh kandidati i koalicionit VLEN për një mandat të dytë, Bilall Kasami, mbrëmë ka zhvilluar një takim me Forumin e Grave të këtij koalicioni në ambientet e komunës – konkretisht në sallën e Këshillit Komunal.

Ky veprim ka ngritur shqetësime serioze për konflikt interesi dhe keqpërdorim të resurseve publike, meqë ligji është i qartë: hapësirat komunale, automjetet zyrtare dhe mjetet teknike të institucioneve nuk mund të vihen në shërbim të aktiviteteve partiake.

Sipas Ligjit për Zgjedhjet dhe rregullave të Komisionit Shtetëror të Zgjedhjeve, është i ndaluar çdo përdorim i administratës shtetërore për qëllime politike – qoftë për mbajtje tubimesh, shpërndarje materialesh apo ushtrim presioni mbi të punësuarit. Qëllimi i këtyre dispozitave është të sigurohet një garë e barabartë mes kandidatëve dhe të shmanget përparësia e padrejtë e pushtetit aktual.

Ky rast pritet të tërheqë vëmendjen e Komisionit Shtetëror për Parandalimin e Korrupsionit, i cili ka kompetenca të monitorojë dhe sanksionojë shkeljet e këtij karakteri. Përdorimi i hapësirave publike për aktivitete partiake shihet si një precedent i rrezikshëm, që dëmton besimin e qytetarëve në procesin demokratik.

Rasti i Tetovës nuk është i vetmi i tillë – organizatat monitoruese të zgjedhjeve kanë paralajmëruar se edhe në të kaluarën pushtetet lokale apo qendrore kanë tentuar të shfrytëzojnë administratën dhe infrastrukturën publike për fushatë. Ky fenomen konsiderohet ndër format më të shpeshta të abuzimit zgjedhor në vend. Flaka Media