Mungesa e librave shkollorë, prindërit detyrohen t’i printojnë vetë për fëmijët

Mungesa e librave shkollorë mbetet problem i përvitshëm në shkollat e vendit. Nxënësit shpesh përballen me libra të dëmtuar rëndë, të papërdorshëm ose të paplotë, ndërsa prindërit detyrohen të gjejnë zgjidhje alternative, duke i printuar vetë librat për fëmijët e tyre.

“Në këtë rast ne kemi libra shumë të dëmtuar, shumë të përdorur dhe jo funksionalë. Është një barrë shumë e rëndë për prindërit që sot t’u blejnë librat vet për fëmijët e tyre. Ministria duhet t’i furnizojë me libra origjinale, jo kopje. Ky është një defekt në ministri, që tregon se diçka nuk funksionon në sistemin e arsimit në këtë shtet,” tha një prind për TVM2.

Një tjetër prind apeloi për zgjidhje të qëndrueshme:
“Ministria e Arsimit është e obliguar që me libra të rinj dhe funksionalë të mësojë çdo nxënës i shkollës fillore dhe të mesme e jo të mungojnë librat. Bëj apel që ky problem të zgjidhet njëherë e përgjithmonë, e jo çdo gjeneratë të përballet me të njëjtën gjë.”

Edhe vetë nxënësit konfirmojnë se detyrohen të fotokopjojnë libra:
“Libra nuk na ka ndodhur të blejmë, por të fotokopjojmë po. Ka dy lëndë, librat e të cilave i fotokopjojmë më së shumti,” tha një nxënës.

Problemin e njeh edhe një pronar librarie në Çarshinë e Shkupit, i cili thekson se shitja e librave është ndaluar me ligj, por nxënësit kërkojnë shpesh fotokopjime për shkak të mungesës së faqeve në librat ekzistues.

“Prej se Qeveria ka sjellë ligj për furnizimin e nxënësve me libra nga ana e saj, nëpër librari është e ndaluar të shiten libra. Nuk ka rrugëdalje tjetër, prandaj nxënësit i fotokopjojnë, sepse shpesh prej librit mungojnë disa faqe ose gjysma e tij,” tha ai.

Përballë mungesës së librave dhe rritjes së shpenzimeve për pajisje shkollore, prindërit dhe nxënësit mbeten të detyruar të improvizojnë, ndërsa presin nga institucionet një zgjidhje përfundimtare.

Burimi: TVM2