Abdixhiku merr përgjegjësinë për rezultatin, dorëheqja në pikëpyetje
Botuar nga Flaka
Kryetari i Lidhjes Demokratike të Kosovës (LDK), Lumir Abdixhiku, ka marrë përgjegjësinë për rezultatin e partisë në zgjedhjet e parakohshme parlamentare, duke mos e përjashtuar as mundësinë e dorëheqjes nga posti i kryetarit.
Abdixhiku bëri të ditur se në ditët në vijim do të thërrasë Kuvendin e Jashtëzakonshëm të LDK-së, ku do të shqyrtohen të gjitha çështjet dhe përgjegjësitë që ai mban si udhëheqës i partisë.
“Duke marrë përgjegjësinë, ditëve në vijim do ta thërras Kuvendin e Jashtëzakonshëm të LDK-së dhe para tij do t’i shqyrtojmë të gjitha çështjet dhe përgjegjësitë që mbaj si kryetar. Rezultati i LDK-së nuk është ai që e kemi pritur dhe dëshiruar. Është moment reflektimi. Kur qytetarët flasin, ne duhet të dëgjojmë. Demokracia funksionon kur udhëheqësit mbajnë përgjegjësi, edhe kur kanë humbje të tilla”, ka deklaruar Abdixhiku.
Ai theksoi se gjatë pesë viteve në krye të LDK-së ka vepruar sipas bindjes së tij për të mirën e partisë, duke zgjedhur profesionistë nga fusha të ndryshme, por pranoi se nuk ka arritur ta çojë LDK-në aty ku, sipas tij, duhet të ishte.
“Sot them hapur, nuk kam arritur ta çojë LDK-në aty ku duhet të jetë”, shtoi ai.
Abdixhiku e cilësoi rezultatin si të papritur dhe theksoi se çdo opsion do të diskutohet në Kuvendin e Jashtëzakonshëm që pritet të thirret. Ai po ashtu uroi fituesin e zgjedhjeve, duke theksuar se interesi i shtetit duhet të jetë mbi çdo interes personal apo partiak.
“Shteti është mbi secilin prej nesh. Le të shpresojmë se qytetarët kanë zgjedhur drejt këtë herë”, përfundoi Abdixhiku. Gazeta Flaka
Botuar nga Flaka
