Arsenali pranë transferimit të Gyokeres: 80 milionë për bomberin suedez

Arsenali është shumë pranë finalizimit të një prej goditjeve më të mëdha të kësaj merkatoje verore. Sipas burimeve të besueshme nga “The Athletic”, klubi londinez ka arritur marrëveshje të plotë me sulmuesin Viktor Gyokeres nga Sporting Lisbona. Suedezi 27-vjeçar ka rënë dakord për një kontratë pesëvjeçare, që do ta mbajë në “Emirates” deri në vitin 2030.

Gyokeres ka shprehur qartë dëshirën për t’u transferuar në Premier League dhe për të veshur fanellën e Arsenalit, duke i komunikuar këtë edhe drejtuesve të Sportingut. Marrëdhëniet mes lojtarit dhe klubit portugez janë tensionuar që pas përfundimit të sezonit, me Sportingun që kërkonte të mos e lejonte largimin pa një ofertë të majme.

Megjithatë, presioni i lojtarit ka qenë vendimtar dhe marrëveshja pritet të mbyllet për një shumë rreth 80 milionë euro. Në sezonin e fundit, Gyokeres ka qenë në formë të jashtëzakonshme, duke realizuar 54 gola në 52 ndeshje – një statistikë që e bën atë një nga sulmuesit më të kërkuar në Europë.

Zubimendi, dëshira e Artetës për mesfushën

Paralelisht me operacionin për Gyokeres, Arsenali ka hedhur sytë edhe nga Martin Zubimendi, mesfushori i Real Sociedad. Trajneri Mikel Arteta e ka identifikuar spanjollin si një përforcim kyç për mesfushën, duke kërkuar nga drejtuesit e klubit që të bëjnë gjithçka për ta sjellë në Londër.

Zubimendi është një lojtar me profil të lartë teknik dhe taktik, i njohur për qetësinë në ndërtimin e lojës dhe aftësinë për të kontrolluar ritmin e ndeshjes. Ai shihet si pasardhës i natyrshëm i Jorginhos dhe një partner ideal për Declan Rice.

Objektivat e Arsenalit për sezonin 2025/26

Me këto dy përforcime të mundshme dhe të tjera që priten gjatë verës, Arsenali synon të jetë protagonist absolut në Premier League dhe në Ligën e Kampionëve. Pas një sezoni ku i mungoi vetëm një hap për të fituar titullin, “Topçinjtë” janë të vendosur të ndërtojnë një skuadër që të garojë në të gjitha frontet.

Flaka