Hije dyshimesh mbi institucionet pas arrestimit të të dyshuarit për vrasje serike në rajonin e Kumanovë

Rasti që ka tronditur opinionin publik në rajonin e Kumanovës ka hapur jo vetëm një hetim penal, por edhe një debat të fortë për përgjegjësinë institucionale. Arrestimi i 25-vjeçarit të dyshuar për disa vrasje të grave të moshuara ka nxitur reagime të shumta nga banorët, të cilët pretendojnë se ai ka qenë i njohur për organet e rendit, por nuk është ndaluar me kohë.

Pas gjetjes së trupit të pajetë të një gruaje në Staro Nagoriçan, i dyshuari u arrestua dhe më pas, me urdhër të organeve hetimore, u realizua zhvarrosja e një rasti tjetër të dyshimtë. Hetimet tani po shtrihen edhe në disa raste të mëhershme, ku gra janë gjetur të vdekura në rrethana të ngjashme.

Banorë të zonës kanë ngritur pretendime se në një rast ekzistonin incizime nga kamera sigurie, por ato nuk ishin pranuar si prova për shkak të mungesës së regjistrimit formal të pajisjeve. Po ashtu, sipas tyre, i dyshuari ishte liruar në disa raste për shkak të gjendjes së tij të supozuar psikike.

Dëshmia e një 86-vjeçareje të sulmuar, e publikuar nga Televizioni Telma, ka shtuar dyshimet se mund të ketë edhe viktima të tjera. Familjarë të saj dhe banorë të fshatrave përreth kanë kërkuar zbardhje të plotë të rasteve dhe sqarim nëse i dyshuari ka vepruar i vetëm apo ka pasur bashkëpunëtorë.

Autori i librit “Vrasje serike në Maqedoni” dhe magjistër i sigurisë, Dimitar Stevçev, vlerëson se raste të tilla mund të parandalohen përmes hetimeve sistematike dhe reagimit të shpejtë institucional. Sipas tij, suksesi i parandalimit varet si nga përgatitja e autorit për të fshehur gjurmët, ashtu edhe nga kapaciteti i institucioneve për të vepruar me kohë.

Nga Ministria e Punëve të Brendshme e Republikës së Maqedonisë së Veriut nuk janë dhënë ende detaje shtesë mbi hetimin, ndërsa Prokuroria ka bërë të ditur se do të shqyrtohet edhe mundësia e përgjegjësisë institucionale.

Jozyrtarisht, raportohet se po hetohen disa raste nga ky vit dhe nga viti i kaluar me tipare të ngjashme. Ndërkohë, në rajon mbizotëron ndjenja e pasigurisë dhe kërkesa për transparencë të plotë mbi mënyrën se si janë trajtuar denoncimet e mëparshme. Gazeta Flaka

104

SONDAZHI

Sa e qëndrueshme është bashkëpunimi mes partive në Koalicionin VLEN?

Bashkëpunimi lëkundet

Bashkëpunimi është i qëndrueshëm

• 
• 
• 
• 
• 
• 
•