Komisioni Evropian: Nuk pranojmë rritje të tarifave amerikane ndaj mallrave të BE-së
Botuar nga Drin Zenku
Komisioni Evropian ka deklaruar se nuk do të pranojë asnjë rritje të tarifave amerikane ndaj mallrave evropiane, pas vendimit të Gjykata Supreme e Shteteve të Bashkuara për të rrëzuar tarifat globale të vendosura nga presidenti Donald Trump.
Reagimi i Brukselit vjen pasi Trump më 20 shkurt shpalli tarifa të përkohshme prej 10%, të cilat një ditë më vonë i rriti në 15%. Ky vendim u mor menjëherë pasi Supremja i shpalli të paligjshme tarifat e mëparshme që ishin në fuqi.
Në një deklaratë të publikuar të dielën, Komisioni – i cili negocion politikën tregtare në emër të 27 shteteve anëtare të BE-së – kërkoi nga Uashingtoni “qartësi të plotë” mbi hapat e ardhshëm pas vendimit të gjykatës.
“Situata aktuale nuk është e favorshme për të ofruar tregti dhe investime transatlantike të drejta, të balancuara dhe reciprokisht përfituese. Marrëveshja është marrëveshje”, thuhet në reagim.
Qëndrimi i ri i Brukselit konsiderohet më i ashpër se deklarata fillestare, kur Komisioni njoftoi se po analizonte vendimin dhe po mbante kontakte me administratën amerikane.
Marrëveshja tregtare BE–SHBA e arritur vitin e kaluar parashikonte një tarifë 15% për shumicën e mallrave evropiane që hyjnë në tregun amerikan, me përjashtime për produkte të caktuara si avionët dhe pjesët e këmbimit, të cilat përfitonin tarifa zero. Nga ana tjetër, BE-ja hoqi detyrimet doganore për shumë produkte amerikane dhe tërhoqi kërcënimin për masa hakmarrëse.
Megjithatë, mbetet e paqartë nëse tarifat e reja 15% të shpallura nga Trump zëvendësojnë apo cenojnë marrëveshjen ekzistuese tregtare mes dy palëve.
Flaka
Botuar nga Drin Zenku
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
