Përplasje e dhunshme në Lushnjë!

Pamje të dhunës dhe tensionit janë publikuar nga një konflikt i ndodhur sot në një nga qendrat e votimit në Lushnjë, ku sipas raportimeve, situata ka degraduar për shkak të akuzave për manipulim dhe intimidim të votuesve, transmeton Flaka Media

Deputeti i Partisë Demokratike, Saimir Korreshi, ka deklaruar se incidenti u shkaktua pasi vëzhgues të Partisë Socialiste, sipas tij, po detyronin punonjës të administratës të fotografojnë votën e tyre. Sipas Korreshit, kjo nuk është një rast i izoluar, por një praktikë e shtrirë në disa qendra votimi.

“Që në mëngjes, anëtarët e QV-së kanë deklaruar se çelësat i mbante drejtori i postës – kjo është absurde dhe e turpshme. Situata është tensionuar dhe agravuar kur një vëzhgues i PS-së u kap duke fotografuar votën, gjë që solli konfliktin fizik,” – tha Korreshi.

Sipas tij, punonjësit e administratës janë nën presion të vazhdueshëm për të dokumentuar votën e tyre, ndërkohë që sipas akuzave, “përdoren edhe forma të tjera presioni për vota, si shpërndarja e ndihmave.”

Deputeti demokrat denoncoi gjithashtu praninë e përfaqësuesve të Tiranës në qendrat e votimit, që sipas tij, ndodhen në kundërshtim me ligjin dhe po “intimidojnë hapur votuesit.”