Skandali i tenderëve me kafiterinë në Çair: VLEN kundër BDI-së, s’ka keqpërdorime

Lëvizja VLEN ka reaguar ashpër pas publikimit të një lajmi nga Portalb.mk, i cili hedh dyshime për keqpërdorime financiare dhe favorizim të një kafiterie në pronësi të zëvendësministres Kaltrina Zekolli Shaqiri nga Lëvizja Demokratike, në bashkëpunim me Komunën e Çairit.

VLEN: Sulm i ulët dhe politik ndaj një gruaje që ka përjetuar tragjedi familjare

Në një reagim të fortë publik, VLEN dënon atë që e quan një “sulm të turpshëm dhe të ulët” nga ana e Bashkimit Demokratik për Integrim (BDI) ndaj znj. Zekolli. Sipas deklaratës, BDI ka përmendur në mënyrë të qëllimshme dhe të pavend një kompani që është trashëguar nga Zekolli pas vdekjes së bashkëshortit të saj.

“BDI është një parti pa busull morale. Sulmi i tyre ndaj një situate familjare pas një tragjedie të freskët është dëshmi e mungesës së çdo minimumi njerëzor në komunikim,” thuhet në reagimin e VLEN.

Partia opozitare thekson se bashkëpunimi me Komunën e Çairit është bërë përmes kontratave të rregullta për ushqimin e sportistëve lokalë dhe me dokumentacion të plotë ligjor. VLEN mohon çdo formë të keqpërdorimit apo favorizimit dhe paralajmëron se znj. Zekolli po shqyrton opsionet ligjore për të mbrojtur integritetin personal e familjar.

Lajmi i Portalb.mk: Pagesa të dyshimta dhe mungesë transparence në prokurime

Sipas një hulumtimi të publikuar nga Portalb.mk, kafiteria “1sh”, në pronësi të Kaltrina Zekolli Shaqirit, ka përfituar në mënyrë të përsëritur shuma që kalojnë pragun ligjor për prokurim publik, pa shpallje dhe në mënyrë direkte nga Komuna e Çairit.

Dokumentet e siguruara tregojnë se:

• Komuna ka lëshuar 825.410 denarë (rreth 14.400 euro) për këtë kafiteri vetëm gjatë vitit 2024.
• Ka raste ku për një ditë janë lëshuar transaksione mbi 2.000 euro, duke tejkaluar kufirin e lejuar për përjashtim nga prokurimet publike.
• Kjo shkelje bie ndesh me nenin 40 të Ligjit për Prokurime Publike, që ndalon ndarjen e qëllimshme të porosive për të shmangur procedurat e tenderimit.

Komuna: Vakta për sportistët, por pa shpjegime për favorizim

Nga Komuna e Çairit kanë pohuar se pagesat janë bërë për ushqimin e sportistëve gjatë garave, por nuk kanë dhënë përgjigje pse është përzgjedhur pikërisht ky lokal dhe pse nuk ka pasur shpallje publike, që do të lejonin konkurrencën e drejtë të operatorëve tjerë ekonomikë.

Zekolli: Jam pronare, por nuk merrem me pagesat

Zëvendësministrja Zekolli e ka pranuar se është pronare e kafiterisë, të cilën e ka trashëguar pas vdekjes së bashkëshortit. Ajo theksoi se nuk është e përfshirë në menaxhimin e përditshëm dhe se nuk merret personalisht me pagesat apo marrëveshjet me komunën.

“Është lokal që e ka pasur bashkëshorti im. Pas vdekjes së tij, jam bërë pronare përmes trashëgimisë. Ka administrator që merret me menaxhimin,” tha Zekolli për Portalb.mk.

A ka përplasje interesi? Lidhjet politike nën lupën e publikut

Sipas të dhënave të publikuara, Zekolli është zëvendësministre nga radhët e Lëvizjes Demokratike, e cila është në koalicion me BDI-në, dhe një ndër bashkëpunëtoret e afërta të kryetarit të Komunës së Çairit, Visar Ganiu. Fotografi dhe njoftime të përbashkëta në rrjetet sociale ngrenë dyshime për lidhje të ngushta politike, të cilat mund të kenë ndikuar në mënyrën e përzgjedhjes së shërbimeve nga komuna.

Qendra për Komunikime Qytetare: Praktikë e përhapur, por jo e ligjshme

Organizata e njohur për monitorimin e prokurimeve publike në Maqedoninë e Veriut, Qendra për Komunikime Qytetare, ka ngritur më herët alarmin për shtimin e kontratave pa shpallje publike dhe favorizimin e bizneseve të lidhura me zyrtarë politikë.

A do të veprojnë institucionet?

VLEN i ka bërë thirrje institucioneve të drejtësisë dhe mediave që të verifikojnë menjëherë faktet, duke e quajtur këtë rast një përpjekje për të devijuar vëmendjen nga skandalet më të mëdha të BDI-së në pushtet.

“A ekziston ndonjë njeri në atë parti që ende njeh kufij, moral dhe njerëzi?”, pyet VLEN në fund të deklaratës.

Reagimi nga BDI: Ky rast dëshmon qartë abuzimin me paranë publike

Pas lajmit të publikuar në Portalb, BDI ka raguar duke thënë se shpreh shqetësim të thellë për “skandalin e radhës në Komunën e Çairit”, ku mijëra euro nga buxheti publik janë derdhur në kafiterinë e zëvendësministres Kaltrina Zekolli-Shaqiri, pa shpallje publike dhe në shkelje të Ligjit për Prokurime Publike, transmeton Portalb.mk.

“Ky rast dëshmon qartë abuzimin me paranë publike, favorizimin e bizneseve të lidhura me zyrtarë të Lëvizjes Demokratike dhe kapjen e institucioneve nga një rrjet i organizuar politik që përdor pushtetin për interesa të ngushta. Kafiteria “1sh”, e njohur si seli alternative e Mexhitit dhe Ganiut, ka përfituar mbi 30 mijë euro nga Komuna e Çairit – vetëm këtë vit mbi 14 mijë euro, pa konkurrencë e transparencë. Abuzimet në Çair shtrihen edhe te ndërtimet pa leje, lejimi selektiv i ndërtimeve shumëkatëshe dhe keqpërdorimi i pronës publike, gjithnjë në shërbim të rrethit politik të Visar Ganiut dhe VLEN-it”, thanë nga BDI.

Ndryshe, Portalb paraprakisht njoftoi se, mijëra euro nga Komuna e Çairit i janë ndarë në mënyrë sistematike kafiterisë ‘1sh’ në pronësi të zëvendësministres së Transportit dhe ndër njerëzve më të afërm të Izet Mexhitit, Kaltrina Zekolli Shaqirit. Mjetet janë ndarë pa shpallje publike dhe me marrëveshje sy-më-sy.

Kompania “NEAR 2015” ka pranuar në mënyrë të vazhdueshme transaksione parash nga 110 mijë deri në 130 mijë denarë nga Komuna e Çairit. Portalb-i zbuloi se në fakt pas kësaj kompanie qëndron kafiteria në Çair që shërben edhe ushqim të shpejtë, e njohur si “1sh”, që është në pronësi të Kaltrina Zekolli Shaqiri, zëvendësministre nga radhët e Lëvizjes Demokratike.