Policia godet raste të dhunës dhe drogës në Pollog – arrestime në Gostivar dhe Tetovë
Botuar nga Flaka
Policia e Gostivarit dhe e Tetovës gjatë datave 28 dhe 29 qershor 2025 ka ndërmarrë një sërë masash operative, duke privuar nga liria disa persona për vepra të ndryshme penale dhe kundërvajtje.
Sulm fizik dhe kërcënime në Gostivar
Më 28 qershor, rreth orës 23:30, në rrugën “B. Ginovski” në Gostivar, policia arrestoi U.N. (24) nga Turqia, pasi paraprakisht, rreth orës 02:45, në një banesë në Gostivar kishte ushtruar dhunë fizike dhe kishte kërcënuar B.Sh. (24) nga Gostivari. Pas dokumentimit të plotë të rastit, do të pasojë kallëzim përkatës.
Ofendim ndaj policisë
Po të njëjtën ditë, rreth orës 20:00, në rrugën “72” në Gostivar, u arrestua F.H. (55), banor i Gostivarit, pasi kishte fyer dhe ofenduar zyrtarët policorë në kryerje të detyrës.
Zbulim i drogës në Gostivar
Më 28 qershor, rreth orës 21:45, gjatë një bastisjeje me urdhër gjyqësor në shtëpinë e D.P. (51) nga Gostivari, u gjetën dhe sekuestruan: një saksi me bimë kanabisi, një enë qelqi me marihuanë, një qese me marihuanë dhe një tjetër me fara kanabisi. Hetimet vazhdojnë dhe do të pasojë kallëzim penal.
Vjedhje në Çegran
Më 28 qershor, në orën 21:30, V.I. (48) nga fshati Çegran ka raportuar se në periudhën 18–28 qershor, nga parcela e tij është vjedhur pajisje ndërtimi. Policia po ndërmerr masa për zbardhjen e plotë të rastit.
Sulm fizik në Tetovë
Më 29 qershor, rreth orës 02:20, në SPB Tetovë është paraqitur një incident ku B.Z. (20) nga fshati Radiovcë ka raportuar se ishte sulmuar fizikisht nga D.J. dhe L.R., në një lojëratore në rrugën “Ilindenska” në Tetovë. Policia është duke punuar për zbardhjen e rastit.
Ngasje e automjetit nën ndikim të alkoolit
Më 28 qershor, rreth orës 22:26, në bulevardin “Vidoe Smilevski Bato” në Tetovë, është ndaluar S.N. (52) nga fshati Zhilçë, pasi gjatë kontrollit u konstatua se po drejtonte veturën e tij “Mazda” me targa të Tetovës me 2.63 promilë alkool në gjak. Pas dokumentimit të rastit, do të ngritet kallëzim penal për “drejtim të pakujdesshëm të automjetit” sipas nenit 297-a të Kodit Penal. Flaka
Botuar nga Flaka
Thumbi sot
