Arrestohet 29-vjeçari i dyshuar për dy tentativa vrasjeje, vjedhje të rënda dhe armëmbajtje pa leje

Një person është arrestuar nga policia e Manastirt nën dyshimin për disa vepra penale të rënda, përfshirë dy tentativa për vrasje, tri vjedhje të rënda, si dhe posedim dhe përdorim të paligjshëm të armëve të zjarrit, transmeton Flaka

“SPB Manastir ka ngritur kallëzim penal kundër G.P. (29) nga fshati Angellci, Komuna e Vasilievës, për shkak të dyshimeve për dy vepra penale ‘vrasje në tentativë’, tre vepra ‘vjedhje të rënda’ dhe një vepër ‘prodhim, mbajtje dhe tregtim i paautorizuar i armëve ose mjeteve shpërthyese’,” njoftoi policia.

Sipas informacionit zyrtar, në periudhën nga 2 deri më 7 korrik 2025, në afërsi të fshatit Kërklino (rajoni i Manastirit), i dyshuari hyri në dy shtëpi të fundjavës, ku shkaktoi dëme materiale pa marrë asgjë. Më pas, në fshatin Dollno Srpci, Komuna e Mogillës, ai përdori forcë për të hyrë në një shtëpi nga ku vodhi një pushkë gjahu kalibri 16 mm dhe dy bidona me karburant.

Ngjarja kulmoi më 7 korrik, kur në të njëjtën zonë, i dyshuari hapi zjarr ndaj një 22-vjeçari dhe dy të miturve të moshës 15 dhe 16 vjeç.

“Me armën e vjedhur, G.P. qëlloi në drejtim të tre personave, një i rritur dhe dy të mitur,” konfirmon raporti i policisë.

Pas incidentit, në hyrje të fshatit Vasharejcë, ai tentoi të qëllojë edhe në drejtim të zyrtarëve policorë, por pa sukses.

“Gjatë përballjes me policinë, i dyshuari u përpoq të qëllojë, por nuk ia doli. Policia u detyrua të reagojë me armë zjarri dhe e plagosi në këmbë, pas çka ai u neutralizua dhe u arrestua.”

Policia e Manastirit informon se ndaj të dyshuarit do të ndiqen të gjitha procedurat penale të parapara me ligj, ndërsa hetimet janë në zhvillim për të ndriçuar plotësisht të gjitha rrethanat e rastit. Flaka