Kërkesa për Specialen – Thaçi e tjerët: Mos spekuloni për “dënime”

Kimberly West e ka të qartë sa burg do të kërkojë për katërshen e UÇK-së që po i ndjek tash e pesë vjet.

Burgimin e përjetshëm e ka vendosur në disa parashtresa e përgjigje ndër vite, ndërkaq është e gatshme që në fjalën përfundimtare prej 180 mijë fjalëve, t’ia kushtojë disa edhe kërkesës për kohëzgjatjen e dënimit.

Hashim Thaçi, Kadri Veseli, Rexhep Selimi dhe Jakup Krasniqi, këtë fakt nuk duan as të përmendin në fjalët e tyre të fundit, e madje kërkuan që dënimi akoma hipotetik, as të mos përmendet deri pas leximit të aktgjykimit.

Kërkesa që fillimisht të dihet se për cilat nga 10 pikat e aktakuzës mund të jenë fajtor e pastaj të dorëzojnë kërkesat në përputhje me ato gjetje, u është refuzuar.

Në dorë të Speciales tanimë është fakti se a do t’i lejojë avokatët të ankohen në Apel.

Kërkesa e Mbrojtjes ka bazë ligjore mirëpo me Rregulloren e Speciales mund të praktikohet si opsion i dytë. Avokatët e arsyetojnë Apelin edhe me faktin se është rasti që ka 25 mijë e 865 faqe vetëm transkripte dëshmish.

Në të gjithë aktgjykimet e tjera si në rastin e Hysni Gucatit, Nasim Haradinajt, Salih Mustafës, Pjetër Shalës – dënimet janë shqiptuar bashkë me leximin e pikave ku të akuzuarit janë gjetur fajtorë, ndërkaq Haxhi Shala, Ismet Bahtijari e Sabit Januzi kanë lidhur marrëveshje për pranimin e fajësisë.

Dhomat e Specializuara të Kosovës (DhSK) në Hagë e kanë vazhduar sërish masën e paraburgimit ndaj ish-presidentit Hashim Thaçi, i cili së bashku me Jakup Krasniqin, Rexhep Selimin dhe Kadri Veselin akuzohen për krime lufte dhe krime kundër njerëzimit.

Paraburgimi ndaj Thaçit është vazhduar edhe për dy muaj, pasi trupi gjykues ka konstatuar se ka rrezik që ai “t’i pengojë procedurat dhe të kryejë krime të tjera në këtë fushë”.

Vendimi është marrë më 10 dhjetor 2025 nga kryetari i trupit gjykues, Charles Smith III.

Në çështjen gjyqësore ndaj ish-krerëve të UÇK-së, mbrojtja e Hashim Thaçit dhe Jakup Krasniqit kanë mbyllur zyrtarisht paraqitjen e provave.

Mbrojtja kishte filluar me paraqitjen e provave të saj më 15 shtator 2025, ku për tri ditë me radhë u dëgjua ish-ndihmësi i sekretarit amerikan të Shtetit, James Rubin.

Ndërsa, pas tij u thirr ish-këshilltari ligjor i delegacionit shqiptar në Rambuje, Paul Williams. Kurse, ish-këshilltari politik i komandantit të lartë të NATO-s, Wesley Clark, John Stewart Duncan filloi dëshminë më 22 shtator dhe e mbaroi më 23 shtator 2025.

Më pas, ish-diplomati amerikan Christopher Hill filloi dëshminë më 10 nëntor 10 nëntor 2025 dhe vazhdoi edhe më 11 nëntor 2025 dhe 12 nëntor 2025. E ish-këshilltari politik i Wesley Clark, Michael Durkee dëshmoi më 12 dhe 13 nëntor 2025. Ndërsa, më 17 nëntor e filloi dëshminë Wesley Clark i cili e përfundoi më pas më 18 dhjetor 2025.

Në mbështetje të ish-krerëve të UÇK-së të cilët po gjykohen në Hagë janë mbajtur katër protesta në Prishtinë, Hagë, Tiranë dhe Strasburg, ndërsa më 13 dhjetor do të mbahet edhe në Shkup.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që iu vihen. Njëjtë është deklaruar edhe Veseli në paraqitjen e tij më 10 nëntor, e po ashtu edhe Rexhep Selimi më 11 nëntor.