Këshilli i Prokurorëve sërish pa vendim për u.d. kryeprokurorin, seanca shtyhet për të hënën
Botuar nga Flaka
18 Dhjetor, 2025 15:11
Marketing Politik
Lajmi u lexua: _ _ 12146
Këshilli i Prokurorëve Publik as sot nuk arriti ta zgjedhë ushtruesin e detyrës kryeprokuror, pas dorëheqjes së Ljupço Kocevskit, për shkak të mungesës së njërit prej anëtarëve. Seanca u shty për ditën e hënë, pasi në mbledhje mungoi prokurorja Jelena Dogazanska Koleva, transmeton Gazeta Flaka.
Anëtarët e Këshillit vendosën që zgjedhja të bëhet vetëm me përbërje të plotë, duke theksuar rëndësinë e momentit dhe nevojën që çdo anëtar të japë mendimin e tij.
“Ne nuk kemi pajisje teknike ndihmëse që ta kyçim kolegen tonë për fat të keq. A do të mundej eventualisht të shtyhet një ditë apo dy, që të vijë edhe kolegia, në mënyrë që kur të dalë Këshilli me qëndrim zyrtar, çdo anëtar të ketë thënë mendimin e vet”, deklaroi Ermon Neziri, anëtar i Këshillit të Prokurorëve.
Në të njëjtën linjë u shpreh edhe anëtari tjetër i Këshillit, Ardian Demiri. “Meqenëse bëhet fjalë për rast serioz dhe moment serioz, do të ishte mirë që si anëtarë të këtij këshilli të japim pikëpamjet tona për kandidatët që do të propozohen për këtë pozicion. Ndoshta nuk do të ishte keq të presim edhe dy apo tri ditë”, tha Demiri.
Sipas Ligjit për Prokurori Publike, ushtruesi i detyrës kryeprokuror duhet patjetër të zgjidhet nga radhët e prokurorëve të Prokurorisë Republikane dhe do ta udhëheqë institucionin deri në zgjedhjen e kryeprokurorit të ri nga Kuvendi, por jo më gjatë se gjashtë muaj. Si emra të mundshëm për zëvendësimin e Kocevskit përmenden Zllatko Bikovski dhe Anita Topollova Isajllovska.
Juristi Ibraim Bajrami, në një intervistë për Alsat, sqaroi procedurën ligjore për zgjedhjen e kryeprokurorit të ri, duke theksuar rolin kyç të Këshillit të Prokurorëve. “Qeveria duhet ta dorëzojë emrin e propozuar te Këshilli për mendim. Afati për dhënien e mendimit është 15 ditë, dhe nëse nuk jepet, ai zgjatet edhe për 15 ditë të tjera. Nëse edhe atëherë nuk ka mendim, kjo llogaritet si mendim pozitiv”, tha Bajrami.
Ai shtoi se pa mendim pozitiv nga Këshilli, propozimi i Qeverisë nuk mund të kalojë në Kuvend. “Është vet Këshilli i Prokurorëve që duhet t’i dalë zot vetvetes dhe të japë mendim pozitiv për kandidatin me imazhin dhe kriterin më apolitik”, theksoi Bajrami.
Ndërkohë, në Kuvend ende nuk ka filluar procedura për zgjedhjen e kryeprokurorit të ri, pasi për hapjen e procesit nevojitet publikimi i shpalljes përkatëse, raporton Gazeta Flaka.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Marrja e paautorizuar e teksteve dhe videove me të drejtë autoriale ose ndonjë përmbajtje të ngjashme pa pëlqimin paraprak me shkrim të Flaka Media do të konsiderohet shkelje e të drejtave autoriale dhe për këtë Flaka e ruan të drejtën të kërkojë kompensim përkatës monetar.Mosrespektimi dhe abuzimi i të drejtave autoriale dhe të drejtave simotër dënohet me ligj.Çdo marrje e paautorizuar, shfrytëzim, përdorim apo publikim i tekstit, fotografitë ose videot apo çfarëdo përmbajtje tjetër e ngjashme që paraqet pronësi të Flaka Media, pa pëlqim paraprak me shkrim nga redaksua, ndalohet rreptësisht dhe për të njëjtën paguhet kompensim përkatës financiar, për çka pronari ka të drejtë të nis procedurë përkatëse.Në rast të marrjes së teksteve autoriale dhe videove apo çfarëdo përmbajtje tjetër, në mënyrë të obligueshme nevojitet pëlqim paraprak nga Flaka Media dhe vendosje të linkut që do të çojë deri në web faqen e Flaka Media. Shkrimet nga MGID, nuk janë në menaxhim të redaksisë.
