Nevzat Bejta në Raven: Dëgjova kërkesat dhe ankesat e banorëve
Botuar nga Flaka
Nevzat Bejta, kandidat i VLEN-it për kryetar të Komunës së Gostivarit në zgjedhjet e përsëritura të 11 janarit, ka zhvilluar sot një takim me banorët e fshatit Raven, ku ka bashkëbiseduar drejtpërdrejt me ta dhe ka dëgjuar kërkesat dhe shqetësimet e tyre.
Sipas Bejtës, banorët e Ravenit kanë shprehur pakënaqësi të mëdha për neglizhencën komunale gjatë viteve të fundit, duke theksuar mungesën e investimeve dhe zhvillimit.
“Takova sot banorët e Ravenit dhe bashkëbisedova me ta, dëgjova kërkesat e tyre dhe ankesat e shumta nga neglizhenca komunale në këto vitet e fundit,” u shpreh Bejta.
Ai theksoi se qytetarët kërkojnë zhvillim real dhe projekte konkrete, ndërsa para tyre prezantoi edhe vizionin dhe projektet që do të realizohen pas marrjes së mandatit.
“Ata kërkuan zhvillim dhe investime, ndërsa unë para tyre prezantova projektet që do të realizohen me ardhjen time në krye të Komunës,” deklaroi kandidati i VLEN-it.
Bejta shtoi se bashkë me banorët është zotuar që çdo projekt dhe çdo punë të realizohet në përputhje me kërkesat e qytetarëve.
“Bashkë u zotuam që çdo punë do të realizohet sipas kërkesave që ata i kanë, sepse pas fitores së madhe më 11 janar, na presin shumë punë të mira,” përfundoi Bejta.
Zgjedhjet e përsëritura për kryetar të Komunës së Gostivarit do të mbahen më 11 janar, ndërsa fushata po vazhdon me takime intensive të kandidatëve me qytetarët në të gjitha vendbanimet e komunës.
Botuar nga Flaka
