Nevzat Bejta viziton lagjen Pitarnica dhe fshatin Çajlë: Koha e punëve të mira
Botuar nga Flaka
Kandidati për kryetar komune i Gostivarit, Nevzat Bejta, ka vijuar takimet me qytetarët, duke nisur ditën me vizitë në lagjen Pitarnica, një nga lagjet më të mëdha të qytetit, e cila ndër vite është zgjeruar ndjeshëm me zona të reja banimi, por që sipas banorëve ka mbetur e harruar nga ish-udhëheqësia komunale.
Në takimin me banorët e Pitarnicës, ata shprehën hapur revoltën dhe zhgënjimin për mospërfilljen e vazhdueshme gjatë tetë viteve të fundit nga pushteti lokal, duke theksuar mungesën e vëmendjes institucionale dhe investimeve konkrete.
Bejta, duke iu drejtuar banorëve, theksoi se projektet e realizuara gjatë mandatit të tij vazhdojnë edhe sot të jenë bazë për zhvillimin e kësaj lagjeje.
“Banorët e Pitarnicës, pavarësisht zhgënjimit të akumuluar ndër vite, u shprehën mirënjohës për projektet që u realizuan gjatë mandatit tim dhe që edhe sot shërbejnë si themel për zhvillimin e lagjes,” u shpreh Bejta.
Ai shtoi se me fitoren e 11 janarit do të rikthehet vëmendja institucionale dhe investimet e nevojshme në çdo lagje të Gostivarit.
“Së bashku, me fitoren e madhe të 11 janarit, do ta rikthejmë zhvillimin e qëndrueshëm dhe investimet e domosdoshme në çdo cep të Gostivarit,” deklaroi Bejta.
Në përmbyllje të ditës, kandidati për kryetar komune vizitoi edhe fshatin Çajlë, ku u takua me banorët dhe bashkëbisedoi nga afër për problemet dhe nevojat e tyre.
“E përmbylla ditën sot duke takuar banorët e fshatit Çajlë. I dëgjova me vëmendje kërkesat e tyre dhe ua prezantova programin tim zgjedhor,” tha Bejta, duke shtuar se investimet do të rikthehen me përkrahje të dyfishtë institucionale.
“Premtova se me përkrahjen e Komunës dhe të pushtetit qendror do të kthehen projektet dhe investimet e nevojshme për këtë vendbanim. Do të punohet sipas kërkesës së banorëve, sepse tashmë është koha e punëve të mira e jo e premtimeve boshe,” përfundoi Bejta. Flaka
Botuar nga Flaka
