Mjekët: Ushtrimet fizike janë hapi i parë për zemër të shëndetshme dhe jetë më të gjatë
Botuar nga Drin Zenku
Aktiviteti fizik mbetet një nga faktorët më të rëndësishëm për ruajtjen e shëndetit të përgjithshëm, por ekspertët thonë se shpeshherë ai reduktohet gabimisht vetëm në aspektin estetik.
Kardiologia Jennifer Graver deklaroi për EatingWell se ushtrimet fizike kanë ndikim të drejtpërdrejtë në uljen e tensionit të gjakut, kontrollin e diabetit dhe përmirësimin e shëndetit mendor.
“E di që të gjithë e dinë këtë, por ushtrimet shpesh nënvlerësohen dhe reduktohen vetëm në një komponent estetik,” theksoi ajo, duke shtuar se aktiviteti fizik trajton shumë prej problemeve kryesore shëndetësore me të cilat përballemi sot.
Edhe kardiologu Sanjay Narula nënvizoi rëndësinë e lëvizjes së rregullt, duke theksuar se ajo ndikon pozitivisht në shëndetin e zemrës, reduktimin e stresit, forcimin e kockave dhe muskujve – në thelb, në gjithë organizmin.
Sipas rekomandimeve të American Heart Association, të rriturit duhet të kryejnë të paktën 30 minuta aktivitet të moderuar kardiovaskular, pesë ditë në javë. Një nga format më efektive të stërvitjes, sipas ekspertëve, është stërvitja me intervale me intensitet të lartë (HIIT).
Graver thekson se HIIT ka dhënë rezultate veçanërisht të mira, sidomos te gratë, pasi ndihmon në përmirësimin e kapacitetit të zemrës brenda një kohe relativisht të shkurtër. Këto ushtrime përbëhen nga intervale të shkurtra dhe intensive që alternohen në cikle dhe zakonisht zgjasin rreth 20 minuta.
Megjithatë, mjekët theksojnë se nuk është e nevojshme të nisni menjëherë një program intensiv. Edhe sasi të vogla ushtrimesh të përditshme, si një shëtitje e thjeshtë, mund të kontribuojnë ndjeshëm në përmbushjen e objektivave javore për aktivitet fizik.
Në fund, qoftë përmes HIIT-it apo ecjes së përditshme, mesazhi i ekspertëve është i qartë: ushtrimet e rregullta janë çelësi për një zemër të shëndetshme dhe një jetë më cilësore.
Flaka
Botuar nga Drin Zenku
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
