Studentët rikthehen në protesta në Iran mes kërcënimeve nga SHBA

Studentë në disa universitete në Iran kanë organizuar protesta antiqeveritare – tubimet e para të kësaj shkalle që nga shtypja e përgjakshme e demonstratave muajin e kaluar.

Sipas pamjeve të verifikuara nga BBC, qindra studentë marshuan në mënyrë paqësore pranë Universiteti i Teknologjisë Sharif në Teheran, duke brohoritur slogane dhe duke bërë homazhe për mijëra persona të vrarë gjatë shtypjes së protestave masive. Tubime të ngjashme janë raportuar edhe në Mashhad, ndërsa në rrjete sociale kanë qarkulluar pamje të paverifikuara për protesta në universitete të tjera të kryeqytetit.

Situata e brendshme vjen në një moment tensionesh të larta ndërkombëtare. Donald Trump ka deklaruar se po shqyrton një sulm të kufizuar ushtarak ndaj Iranit, ndërsa SHBA-të dhe aleatët evropianë dyshojnë se Teherani po lëviz drejt zhvillimit të armëve bërthamore – pretendim që autoritetet iraniane e mohojnë vazhdimisht.

Zyrtarë amerikanë dhe iranianë u takuan së fundmi në Zvicër dhe njoftuan për “progres” në bisedimet mbi programin bërthamor. Megjithatë, Trump paralajmëroi se brenda 10 ditëve të ardhshme do të bëhet e qartë nëse do të arrihet marrëveshje apo do të ndërmerren veprime ushtarake.

Sipas Agjencisë së Lajmeve të Aktivistëve të të Drejtave të Njeriut (HRANA), me seli në SHBA, që nga fillimi i trazirave janë konfirmuar mbi 6,000 viktima, përfshirë mijëra protestues. Nga ana tjetër, autoritetet iraniane kanë raportuar mbi 3,100 të vrarë, duke theksuar se shumica ishin pjesëtarë të forcave të sigurisë ose civilë të sulmuar.

Ndërkohë, opozita iraniane në mërgim i ka bërë thirrje Trumpit të zbatojë kërcënimet e tij për ndërhyrje, duke shpresuar në rrëzimin e shpejtë të qeverisë aktuale. Grupe të tjera opozitare, megjithatë, kundërshtojnë çdo ndërhyrje të jashtme. Paralelisht, palët po zhvillojnë fushata të forta dezinformimi në rrjetet sociale për të ndikuar opinionin publik brenda dhe jashtë vendit.

Protestat e fundit konsiderohen një test i ri për stabilitetin e brendshëm të Iranit, në një kohë kur vendi përballet me presion të shtuar ndërkombëtar dhe rrezik të përshkallëzimit ushtarak.

Flaka

67

SONDAZHI

Sa e qëndrueshme është bashkëpunimi mes partive në Koalicionin VLEN?

Bashkëpunimi lëkundet

Bashkëpunimi është i qëndrueshëm

• 
• 
• 
• 
• 
• 
•