Kuvendi sot diskuton pagat e prokurorëve, Shoqata kërkon tërheqjen e ligjit

Kuvendi pritet të mbajë sot seancën e 89-të, me një rend dite të ngarkuar që përfshin emërime në disa institucione kyçe rregullatore dhe ndryshime ligjore me procedurë të shkurtuar.

Në rend dite janë propozimi për emërimin e kryetarit dhe anëtarëve të Komisionit Rregullator për Banesat, si dhe shpallja e thirrjes publike për emërimin e një anëtari dhe të kryetarit të Komisionit Rregullator për Energjetikë, Shërbime të Ujit dhe Shërbime për Menaxhimin e Mbeturinave Komunale.

Deputetët do të shqyrtojnë edhe shpalljen e thirrjes publike për emërimin e drejtorit dhe zëvendësdrejtorit të Agjencisë për Mbrojtjen e të Drejtës për Qasje të Lirë në Informacionet me Karakter Publik, si dhe vendime për zgjedhjen e një anëtari të Komisionit për Parandalim dhe Mbrojtje nga Diskriminimi dhe të një anëtari të Komisionit Shtetëror për Parandalimin e Korrupsionit.

Në pjesën ligjore, në procedurë të shkurtuar janë përfshirë ndryshimet në Ligjin për shëndetin veterinar, Ligjin për identifikimin dhe regjistrimin e kafshëve, Ligjin për deputetët, si dhe Ligjin për pagat dhe kompensimet e tjera të personave të zgjedhur dhe të emëruar.

Vëmendje të veçantë pritet të marrin edhe ndryshimet në ligjet që rregullojnë pagat në sistemin e drejtësisë: Propozim-ligji për ndryshimin e Ligjit për pagat e prokurorëve publikë, për pagat e gjykatësve, për pagat e anëtarëve të Këshillit të Prokurorëve Publikë dhe për pagat e anëtarëve të Këshillit Gjyqësor – gjithashtu me procedurë të shkurtuar.

Lidhur me këtë pikë, Shoqata e Prokurorëve Publikë ka kërkuar nga Kuvendi që të tërheqë nga rendi i ditës ndryshimet e propozuara në Ligjin për pagat e prokurorëve, transmeton TV21. Në reagimin e saj, Shoqata thekson se pagat aktuale të prokurorëve në vend janë ndër më të ulëtat në rajon, duke u luhatur nga 90.000 deri në 130.000 denarë (rreth 1.500–2.100 euro).

Për krahasim, sipas Shoqatës, pagat mesatare mujore të prokurorëve në rajon variojnë nga 1.600 deri në 4.000 euro në Serbi, 1.600–4.700 euro në Mal të Zi, 1.600–3.000 euro në Shqipëri dhe rreth 3.000 euro në Bullgari, plus bonus vjetor.

Ata paralajmërojnë se çdo ulje e mëtejshme e pagave cenon pavarësinë e prokurorëve dhe mund të ndikojë negativisht në funksionimin e sistemit të drejtësisë.

Po ashtu, Shoqata njofton se Gjykata Kushtetuese e Republikës së Maqedonisë së Veriut ka nisur procedurë për vlerësimin e kushtetutshmërisë së ndryshimeve të fundit ligjore, duke kërkuar që propozimet të rishikohen në detaje përpara se të procedohen më tej në Kuvend. Gazeta Flaka

41

SONDAZHI

Si e vlerësoni veprimin e Artan Grubit për vetëdorëzim para drejtësisë?

Veprim i duhur për t’i dhënë hapësirë drejtësisë

Veprim politik për të kamufluar drejtësinë

• 
• 
• 
• 
• 
• 
•