VMRO akuzon LSDM për lidhje me Grubin, LSDM: VMRO-ZNAM refuzoi pagën minimale 600 euro
Botuar nga Flaka
LSDM dhe VMRO-DPMNE kanë shkëmbyer akuza të ndërsjella lidhur me rritjen e pagës minimale dhe me zhvillimet e fundit rreth ish-zëvendëskryeministrit Artan Grubi, përcjell Gazeta Flaka
Nga LSDM thonë se deputetët e koalicionit VMRO-ZNAM nuk e mbështetën propozimin e tyre për rritjen e pagës minimale në 600 euro, duke refuzuar të votojnë ligjin e paraqitur nga kjo parti. Sipas tyre, Qeveria ka mjete për tenderë dhe shpenzime luksoze, por jo për rritjen e pagave të mbi 200 mijë punëtorëve. Ata theksojnë se, në kushte kur shporta sindikale tejkalon 67.000 denarë dhe kostot e jetesës janë në rritje, refuzimi i ligjit përbën goditje ndaj standardit jetësor të qytetarëve. LSDM njofton se do të vazhdojë të kërkojë rritje të pagës minimale përmes ribalancimit të buxhetit dhe rialokimit të mjeteve nga shpenzimet joprioritare.
Nga ana tjetër, VMRO-DPMNE akuzon LSDM për bashkëpunim dhe tolerim të, siç thonë ata, keqpërdorimeve milionëshe gjatë periudhës së qeverisjes së përbashkët me BDI-në. Sipas VMRO-DPMNE-së, pas arrestimit të Artan Grubit, LSDM ndodhet në konfuzion dhe frikë nga dëshmitë e mundshme që mund të implikojnë ish-funksionarë të lartë të partisë. Ata kërkojnë përgjegjësi individuale dhe hetim profesional, transparent dhe joselektiv nga institucionet kompetente.
Të dyja partitë theksojnë nevojën për përgjegjësi dhe transparencë, ndërsa debati politik për pagën minimale dhe për rastet e dyshuara të keqpërdorimeve vazhdon. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
