Kush është ky që shfaq urrejtje ndaj shqiptarëve?
Botuar nga Flaka
Zëvendëskryeministri dhe ministri për Marrëdhënie Ndëretnike, Ivan Stoilkoviq, është vënë sërish në qendër të debatit publik pasi ka suspenduar shtatë administratorë shqiptarë vetëm pak orë pasi ata u rikthyen në punë me vendim të Agjencia për Administratë.
Komisioni i shkallës së dytë pranë kësaj agjencie kishte konstatuar se largimi i tyre nga puna ishte i pabazuar dhe kishte urdhëruar rikthimin e menjëhershëm në vendet e punës. Megjithatë, sipas burimeve brenda ministrisë, në ditën kur administratorët u paraqitën në zyrë, atyre u është dorëzuar vendimi për suspendim deri në përfundimin e një procedure të re para Komisionit disiplinor të brendshëm.
Ky komision përbëhet nga shtatë anëtarë – katër serbë dhe tre shqiptarë, ku njëri prej anëtarëve shqiptarë është pjesë e kabinetit të ministrit. Burime nga brenda institucionit shprehen se përbërja aktuale ka ngritur pikëpyetje për paanshmërinë e procesit disiplinor.
Fillimisht, administratorët ishin akuzuar për sjellje të papërshtatshme në ambientet e punës, konkretisht për vendosjen e dyshekëve në zyrë. Në procedurën e re disiplinore, ata akuzohen për dëmtim të inventarit, përkatësisht për përshtatjen e karrigeve për fjetje.
Administratorët shqiptarë e konsiderojnë rastin si presion institucional dhe diskriminim, duke theksuar se kushtet e punës në ministri janë të papërshtatshme, me mungesë të hapësirës, pajisjeve bazë dhe detyrave të qarta pune.
Vendimi fillestar për largimin e tyre ishte marrë më 25 dhjetor, ndërsa më 30 janar Komisioni i shkallës së dytë pranë Agjencia për Administratë kishte konstatuar se nuk kishte shkelje dhe se procedurat ligjore nuk ishin respektuar. Suspendimi i fundit e rikthen çështjen në një fazë të re përballjeje institucionale dhe politike, me pritje për epilogun e radhës nga organet kompetente. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
