Pronari i diskotekës “Puls” pretendon kërcënime me vdekje para gjyqit për zjarrin tragjik
Botuar nga Flaka
Grozdan Milkovski, pronari i objektit ku funksiononte diskoteka “Puls”, deklaroi sot para fillimit të seancës gjyqësore për zjarrin tragjik se ka marrë informacione për kërcënime ndaj jetës së tij.
Ai tha se ka dëgjuar se disa grupe në Koçan po përgatiten ta vrasin. Sipas tij, edhe pse është liruar nga spitali, gjendja e tij shëndetësore mbetet e rëndë.
“Unë nuk mund të paguaj më shoferë që të më çojnë në seancat gjyqësore. Udhëtimi është një orë e gjysmë vajtje dhe një orë e gjysmë kthim. Kur kthehem, përfundoj në shtrat duke luftuar për jetën. Po dëgjoj gjithashtu se disa grupe në Koçan po përgatiten të më marrin jetën”, deklaroi Milkovski.
Ai theksoi se kohët e fundit ka pasur probleme serioze shëndetësore, duke përmendur sepsë në kraharor dhe një bakterie në fyt.
Nga ana tjetër, gjyqtarja Dijana Gruevska Ilievska tha se gjykata është informuar nga mjekët për gjendjen e tij shëndetësore.
“E di që ju është gjetur bakteria. Gjykata bëri gjithçka që mundi, por nuk mund t’ju sigurojë transport deri në sallën e gjyqit”, tha gjyqtarja.
Milkovski paralajmëroi se nuk do të marrë pjesë në seancën e radhës, ndërsa gjyqtarja i bëri të ditur se nëse mungon përsëri, mund të propozohet paraburgimi për të.
“Nëse duhet, do të shkoj në paraburgim”, u përgjigj ai.
Avokatët e të akuzuarve në rastin e Koçanit kërkuan që procedura të bashkohet me atë kundër 13 policëve të akuzuar për vepra të rënda kundër sigurisë publike. Ivana Kocevska, mbrojtëse e pronarit të diskotekës, tha se bëhet fjalë për të njëjtin rast, dhe procedurat e ndara mund të sjellin vendime të ndryshme.
“Këshillat gjyqësore të ndryshme mund të nxjerrin përfundime të ndryshme për të njëjtin ngjarje penale, gjë që mund të rezultojë në vendim për përsëritjen e njërës nga dy procedurat. Shumë persona janë të akuzuar për të njëjtën vepër penale dhe për të njëjtën ngjarje penale, por procedurat zhvillohen ndaras para të njëjtës gjykatë. Sipas Kodit të Procedurës Penale, gjykata duhet t’i bashkojë procedurat për të parandaluar vendosjen e dy vendimeve të ndryshme për të njëjtin rast”, tha Ivana Kocevska, avokate.
Avokati Petre Shilegov gjithashtu u pajtua me kërkesën e Kocevskës, duke theksuar se është e nevojshme bashkimi i procedurave për të filluar gjykimin e vërtetë për këtë rast, dhe të gjithë mbrojtësit e të akuzuarve ranë dakord me këtë. Këshilli gjyqësor u tërhoq dhe vendosi të mos pranojë këtë kërkesë, duke arsyetuar se kjo do të çonte në zvarritje të procedurës. “Kërkesa e mbrojtjes refuzohet për shkak të efikasitetit të procedurës. Ky rast tashmë është në fazën e provave, dhe prania e kërkesës do të sillte zvarritje të mëtejshme të procesit”, thonë nga Këshilli Gjyqësor.
Nga Prokuroria Publike u theksua se ata nuk janë kompetentë për procedura penale ku akuzohen policë dhe se ekzistojnë prokurorë në departamentin e specializuar të Prokurorisë Publike për ndjekjen e krimit të organizuar dhe korrupsionit. “Kjo çështje mbi kompetencën u tejkalua që në fillim. Është befasuese kërkesa për bashkimin e procedurës, kur mbrojtja ka bërë shumë herë vërejtje për kompleksitetin e rastit dhe numrin e të akuzuarve. Ne nuk jemi të autorizuar të veprojmë mbi një rast të një prokurorie tjetër”, thonë nga Prokuroria Publike.
Rasti me 13 oficerë policie po ndiqet sepse ata natën e 16 marsit ishin në detyrë dhe ndodheshin në diskotekën “Puls” dhe duhet të parandalonin aktivizimin e piroteknikës, e cila shkaktoi zjarrin. Në seancën e sotme u thirrën katër dëshmitarë që rrëfyen atë që ndodhi atë natë. Martina Ristevska, e cila ishte në diskotekë atë mbrëmje, tha se aksidentalisht e kishte regjistruar zjarrin me telefonin e saj celular, sepse po xhironte grupin D.N.K. gjatë performancës. Pasi këngëtari tha se të gjithë duhej të dilnin, u krijua një turmë e madhe dhe të gjithë u drejtuan drejt derës ku ngelën të bllokuar, por anëtarët e sigurimit ndihmuan shumë në shpëtim. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
