Kryesia e re e VLEN-it “izolohet” në Çair dhe Tetovë? Jashtë mbeten shumica e zonave shqiptare
Botuar nga Flaka
Përbërja e re e kryesisë së koalicionit VLEN po ngre debat në opinionin publik, pasi struktura drejtuese duket se është përqendruar pothuajse tërësisht në dy zona – Çair dhe Tetovë – ndërsa shumë qytete dhe vendbanime të tjera shqiptare mbeten pa përfaqësim në nivelin më të lartë të koalicionit, shkruan Gazeta Flaka.
Sipas përbërjes së publikuar, VLEN do të drejtohet nga bashkëkryetarët Bilall Kasami dhe Izet Mexhiti, ndërsa nënkryetarë janë Ilir Demiri dhe Bekim Qoku. Sekretar i përgjithshëm është Bekim Sali.
Megjithatë, analiza e përfaqësimit territorial ka ngritur kritika, pasi në këtë strukturë nuk ka përfaqësues nga një numër i madh qytetesh dhe zonash me popullsi shqiptare, si Kumanovë, Gostivar, Dibër, Strugë dhe Kërçovë.
Po ashtu, pa përfaqësim në kryesinë e re mbeten edhe një sërë komunash dhe vendbanimesh shqiptare në dhe rreth Shkup, përfshirë Haraçinë, Saraj dhe Likovë.
Në listën e zonave të anashkaluara përfshihen gjithashtu edhe qytete me komunitete shqiptare në jug të vendit, si Manastir, Resnjë dhe Prilep.
Kjo ka shtuar perceptimin se drejtimi i ri i VLEN-it është i përqendruar kryesisht në dy qendra politike – Çair dhe Tetovë – duke lënë jashtë shumicën e hapësirës shqiptare në Maqedonia e Veriut.
Debati u intensifikua edhe pas vizitës së krerëve të koalicionit në Prishtinë, ku u takuan me kryeministrin e Kosovës Albin Kurti, pas homazheve në Prekaz, në konakun e familjes së komandantit legjendar Adem Jashari.
Në rrjetet sociale nuk munguan reagimet kritike. Aktivistja dhe analistja qytetare Nafie Selmani ironizoi:
“Thuhet se Billi në një takim të ketë thënë: A i ka bë Qoku bile dy vota në Strugë? Të gjithë tjerët tallen me gafet e tij dhe paraqitjet skandaloze të Qokut në media, por Albin ‘baba’ ua ul në krye të vendit e këta zë s’guxojnë me i bë.”
Ndërkohë analisti politik Sefer Selimi paralajmëroi për rrezikun e politizimit të simbolikës së luftës në Prekaz:
“Një koalicion që në thelb është vetëm një zgjatje ‘shqiptare’ e VMRO-DPMNE dhe që shërben si transmetues i politikave anti-shqiptare të kësaj qeverie.”
Edhe gazetari Rami Mislimi e përmblodhi situatën me një fjali të shkurtër:
“Foto me Kurtin, nënshkrim me Mickovskin!”
Pas vizitës në Kosovë, bashkëkryetari i VLEN-it Izet Mexhiti shkroi:
“Pas Prekazit në konakun e Bacit Rifat, në Prishtinë tek kryeministri Albin Kurti. VLEN-i një!”
Megjithatë, kritikat po përqendrohen gjithnjë e më shumë te fakti se përbërja e re e drejtimit të koalicionit duket se përfaqëson vetëm dy zona kryesore, ndërsa një pjesë e madhe e vendbanimeve shqiptare në vend mbeten jashtë vendimmarrjes politike të këtij formacioni. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
