100 gra nga disa komuna nderohen nga Aleanca për Shqiptarët për kontribut profesional jetësor
Botuar nga Linda Limani
Në kuadër të aktiviteteve për shënimin e ditës botërore të gruas, Sekretariati për Barazi Gjinore i Aleanca për Shqiptarët, i udhëhequr nga Njomza Shaqiri, në bashkëpunim me këshilltaret komunale të partisë në nivel vendi, organizoi një aktivitet simbolik për vlerësimin e kontributit të grave në shoqëri.
“Në kuadër të këtij aktiviteti u shpërndanë Mirënjohje për Kontribut Profesional Jetësor për 100 gra të dalluara nga disa komuna, përkatësisht nga Tetova, Gostivar, Kërçova, Dibra, Vrapçishti, Likova, Çair, Gazi Baba, Saraj dhe Tearca. Me këtë rast u nderuan gra që me përkushtimin dhe profesionalizmin e tyre kanë lënë gjurmë të rëndësishme në fusha të ndryshme të jetës shoqërore”, njoftoi Shaqiri.
Lideri i Aleanca për Shqiptarët, Arben Taravari, theksoi rëndësinë e rolit të gruas në shoqëri dhe vlerësoi angazhimin e këshilltareve komunale të partisë në organizimin e këtij aktiviteti.
“Gratë janë një nga shtyllat më të forta të shoqërisë sonë. Përmes këtij aktiviteti kemi dashur të shprehim mirënjohjen dhe respektin për kontributin e tyre të jashtëzakonshëm ndër vite në fusha të ndryshme të jetës shoqërore”, deklaroi Taravari.
Ai shtoi se fuqizimi i grave është një proces i domosdoshëm për zhvillimin e shoqërisë.
“Fuqizimi i rolit të gruas në shoqëri nuk është vetëm çështje barazie, por një domosdoshmëri për zhvillimin dhe progresin e përgjithshëm të shoqërisë sonë”, theksoi ai.
Nga Aleanca për Shqiptarët bëjnë të ditur se aktiviteti kishte për qëllim promovimin dhe vlerësimin e rolit të pazëvendësueshëm të grave në ndërtimin e një shoqërie më të drejtë, më të barabartë dhe më të zhvilluar, duke theksuar se partia do të vazhdojë të mbështesë dhe të fuqizojë gratë në çdo sferë të jetës publike dhe institucionale. Gazeta Flaka
Botuar nga Linda Limani
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
