Arjanit Hoxha kërkon dorëheqjen e Kostandinovskit: Po nxit urrejtje ndaj gjuhës shqipe
Botuar nga Flaka
Nënkryetari i Bashkimi Demokratik për Integrim, Arjanit Hoxha, ka reaguar ashpër ndaj deklaratave të kryetarit të Gjykata Kushtetuese e Maqedonisë së Veriut, Darko Kostadinovski, duke kërkuar dorëheqjen e tij.
Hoxha thekson se është për keqardhje që një gjykatës, i cili duhet të mbrojë Kushtetutën dhe rendin kushtetues të vendit, sipas tij, përmes deklaratave publike po shfaq urrejtje ndaj gjuhës shqipe dhe shqiptarëve.
“Është për keqardhje që një gjykatës, i cili duhet të jetë mbrojtës i Kushtetutës dhe rendit kushtetues të vendit, përmes fjalëve të tij ‘tradhtohet’ nga nënvetëdija, duke nxjerrë në pah urrejtjen ndaj gjuhës shqipe dhe shqiptarëve”, ka deklaruar Hoxha.
Sipas tij, debati me persona si Kostadinovski bëhet i pakuptimtë, pasi qëndrimet e tij nuk mbështeten në fakte dhe argumente.
“Fatkeqësisht, debati me persona si Darko Kostandinovski bëhet i pakuptimtë. Qëndrimet e tij nuk mbështeten në fakte dhe as në argumente, por më tepër në shërbim të qarqeve që përpiqen me çdo kusht të krijojnë problem nga një çështje që është e pastër, e qartë dhe e garantuar si nga Kushtetuta, ashtu edhe nga Ligji për përdorimin e gjuhëve”, u shpreh ai.
Hoxha shtoi se gjuha duhet parë si pasuri dhe jo si kërcënim, duke sjellë edhe një shembull ndërkombëtar.
“Sekretari i Shtetit i SHBA-së, Marco Rubio, është i lindur në Shtetet e Bashkuara nga prindër kubanezë emigrantë dhe e gëzon plotësisht të drejtën të flasë gjuhën e tij amtare. Ndërkohë shqiptarët në Maqedoninë e Veriut, të lindur këtu prej brezash, përballen ende me interpretime shoviniste që përpiqen t’ua mohojnë ose kufizojnë të drejtën për përdorimin e gjuhës shqipe”, ka theksuar Hoxha.
Në fund, ai kërkoi dorëheqjen e menjëhershme të Kostadinovskit.
“Gjuha nuk është kërcënim për askënd. Ajo është pasuri, identitet dhe respekt për njëri-tjetrin. Prandaj Darko Kostandinovski duhet të japë dorëheqje sa më shpejt, sepse po luan me të ardhmen e Maqedonisë së Veriut”, ka përfunduar Hoxha.
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
