Hasani: Qëndrimet e Kryetarit të Gjykatës Kushtetuese janë për t’u dënuar, jo vetëm për t’u kritikuar
Botuar nga Flaka
Deputeti nga BDI, Ilir Hasani, reagoi ashpër ndaj qëndrimeve të Kryetarit të Gjykatës Kushtetuese, Kostadinovski, duke i cilësuar si antishqiptare dhe kundër parimeve kushtetuese të vendit.
“Deklarimet dhe qasja e tij treguan qartë një frymë përjashtuese dhe nacionaliste që bie ndesh drejtpërdrejt me rolin që duhet të ketë një kryetar i Gjykatës Kushtetuese – mbrojtjen e kushtetutshmërisë, barazisë dhe të drejtave të të gjithë qytetarëve,” tha Hasani.
Ai shtoi: “Vetë emri i këtij institucioni – Gjykatë Kushtetuese – nënkupton mbrojtjen e rendit kushtetues për të gjithë qytetarët dhe për të gjithë popujt që përbëjnë këtë shtet, jo vetëm për një popull apo një gjuhë. Gjykatësit shqiptarë në këtë institucion duhet të ngrisin zërin dhe, nëse është e nevojshme, të ngrenë edhe procedura për diskriminim institucional. Heshtja përballë një gjuhe të tillë vetëm e normalizon atë.”
Hasani theksoi se një shtet demokratik dhe multietnik nuk mund të tolerojë qasje që reduktojnë rendin kushtetues në një perspektivë monoetnike: “Sot duhet të flasim të gjithë, pa dallim partie. Me qëndrimet e sotme ai dëshmoi se nuk po vepron si mbrojtës i kushtetutshmërisë dhe i rendit juridik të vendit, por si një figurë që me retorikë nacionaliste minon vetë themelet e shtetit dhe të bashkëjetesës.”
Deputeti përfundoi duke kërkuar veprim konkret: “Nëse flasim për reforma serioze në gjyqësor, ato duhet të fillojnë pikërisht nga maja e institucioneve. Një kryetar i Gjykatës Kushtetuese që shfaq qasje të tilla nuk mund të jetë garant i rendit kushtetues dhe i barazisë. Nëse ka vullnet për reformë të vërtetë në drejtësi, ai duhet të largohet nga kjo detyrë. Ne kemi detyrim të ngrejmë zërin, sepse heshtja përballë padrejtësisë është bashkëfajësi.” Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
