Gjykata Kushtetuese – Ali Ahmeti e aktivizon alarmin tek faktori ndërkombëtar
Botuar nga Flaka
Ali Ahmeti e aktivizon alarmin tek faktori ndërkombëtar! Përmes një non-paperi të dërguar ambasadave në vend, ai paralajmëron se, sipas dokumentit të cilin e ka siguruar TV24, Gjykata Kushtetuese mund të destabilizojë marrëdhëniet ndëretnike në vend.
Nga BDI në dokument akuzohet se, duke hapur çështje të mbyllura lidhur me të drejtat e shqiptarëve, Gjykata Kushtetuese është shndërruar në një institucion parapolitik, i cili përmes mbivotimit sipas vijave etnike merr vendime me karakter etnik.
Lideri i integristëve, Ahmeti u kërkon përfaqësuesve ndërkombëtarë mbështetje për vendosjen e parimit të Badenterit në votimin e Gjykatës Kushtetuese.
Vendimi i fundit për “Safe City”, shfuqizimi i “balancuesit”, procedura për gjuhën shqipe, si dhe, siç rendit BDI në dokument, rrezikimi i rasteve të Hagës, nga Reçica e Vogël paraqiten si argumente para faktorit ndërkombëtar përse duhet të vendoset Badenteri në Gjykatën Kushtetuese.
Në non-paperin e BDI-së thuhet: “Në shumicën e rasteve votimi zhvillohet sipas vijave etnike, me mungesë të theksuar të argumentimit profesional. Kjo e përforcon bindjen se Gjykata Kushtetuese po shndërrohet në një institucion parapolitik, duke rihapur çështje që prej kohësh janë zgjidhur dhe duke vënë në pikëpyetje vendime dhe ligje të miratuara me shumicë të dyfishtë, pa argumentim profesional dhe pa bazë. Hapja e këtyre çështjeve, pa bazë dhe argumentim profesional, e madje edhe sipas vijave etnike, mund të shkaktojë polarizim të mëtejshëm dhe destabilizim politik e shoqëror”.
BDI tashmë ka kërkuar dorëheqjen e kryetarit të Gjykatës Kushtetuese, Darko Kostadinovski, për hedhjen poshtë të iniciativave lidhur me “Safe City”, ndërsa në lojë është edhe një kallëzim penal ndaj Kostadinovskit për rrëzim të rendit kushtetues.
Nga BDI thonë se destabilizimi ndëretnik lidhet edhe me qeverinë e Hristijan Mickoskit, e cila sipas tyre, përmes presionit të fortë, po përgatit shfuqizimin e një numri të madh dispozitash të Ligjit për gjuhën shqipe.
Në dokumentin e BDI-së thuhet gjithashtu: “Për shkak të reagimeve të forta publike, protestave dhe tensioneve të rritura në opinion, seanca u shty me arsyetimin se duhet të mbahet një seancë përgatitore, e cila deri më tani nuk është mbajtur. Në të njëjtin kontekst problematik, Gjykata Kushtetuese ka hapur dhe është marrë edhe me çështje të tjera shumë të ndjeshme, si iniciativa lidhur me ‘rastet e Hagës’, e paraqitur nga Pavle Trajanov. Për ‘rastet e Hagës’ procesi është në vijim dhe pritet që kjo çështje të gjenerojë interes të gjerë publik, pasi ndikon drejtpërdrejt në Ligjin për Amnisti”.
Sipas BDI-së, Gjykata Kushtetuese është shndërruar në një mjet të VMRO-DPMNE-së, gjë që sipas tyre, dëshmohet edhe nga zgjedhja e këshilltarit të kryeministrit, Goce Naumovski, për gjykatës kushtetues.
Përmes këtij non-paperi, Ali Ahmeti thekson se qëllimi i BDI-së mbetet ruajtja e karakterit unitar të shtetit me respektimin e Marrëveshjes së Ohrit. Sipas tij, për këtë është e domosdoshme: zgjedhja e një qeverie me parimin e Badenterit, shumicë e dyfishtë në vendimmarrjen e Gjykatës Kushtetuese, decentralizimi, si dhe procesi i vettingut.
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
