Fetai sfidon Alsat-in: Nxirrni fakte për “mosmarrëveshjet”, jo insinuata

Zëvendëskryeministri dhe përfaqësuesi i Aleanca për Shqiptarët, Arben Fetai, ka reaguar ndaj raportimeve të Alsat lidhur me gjoja përçarje mes tij dhe koalicionit VLEN, duke i cilësuar ato si të pabazuara dhe spekulative.

“Në lidhje me lajmin e Alsat për gjoja mosmarrëveshje mes meje dhe koalicionit VLEN, sfidoj publikisht mediumin dhe burimet e tij që të dalin me fakte konkrete dhe t’i shtjellojnë këto insinuata. Le të del e vërteta në shesh”, deklaroi Fetai.

Ai sqaron se nëse si “mosmarrëveshje” konsiderohet kundërshtimi i tij ndaj modelit të udhëheqjes së VLEN-it me dy kryetarë, atëherë bëhet fjalë për një qëndrim parimor dhe kolektiv.

“Nëse me ‘mosmarrëveshje’ nënkuptohet kundërshtimi im ndaj modelit të udhëheqjes me dy kryetarë, atëherë po, kemi dallime thelbësore. Ky nuk ishte qëndrim personal, por vendim unanim i ASH-së”, theksoi ai.

Fetai shtoi se ky qëndrim është mbështetur edhe nga figura të tjera brenda partisë, duke ngritur pikëpyetje për ndryshimet e tyre të qëndrimit.

“Se çfarë i ka motivuar ata që brenda nate të pranojnë këtë model, pa debat dhe pa vendim të ri, këtë duhet ta sqarojnë vetë ata”, u shpreh ai.

Duke folur për angazhimin e tij politik, Fetai theksoi se ka vepruar gjithmonë mbi bazën e parimeve dhe jo interesave të momentit.

“Unë gjithmonë jam udhëhequr nga bindjet dhe parimet, jo nga kalkulimet e ulëta politike”, deklaroi ai, duke përmendur edhe qëndrimet e tij të mëhershme brenda ASH-së dhe raportet me liderë politikë.

Ai gjithashtu theksoi rolin e Aleanca për Shqiptarët në krijimin e koalicionit VLEN, duke vlerësuar se ky i fundit ka “borxh” ndaj aktivistëve dhe votuesve të ASH-së.

“VLEN-i më ka shumë borxh personalisht, por mbi të gjitha, i ka borxh çdo aktivisti dhe çdo votuesi të ASH-së. Pa angazhimin tonë, sot nuk do të ekzistonte VLEN-i”, tha Fetai.

Në fund, ai u bëri thirrje figurave të koalicionit që të sqarojnë publikisht çdo pretendim për mosmarrëveshje.

“Le të pyeten Izet Mexhiti, Bilall Kasami, Bekim Sali dhe Bekim Qoku se çfarë mosmarrëveshje kanë pasur ndonjëherë me mua. Të tjerët që shpikin ‘mosmarrëveshje’ janë thjesht mercenarë dhe tradhtarë”, përfundoi Fetai.

Reagimi i tij vjen në një kohë tensionesh politike brenda spektrit opozitar shqiptar, ndërsa debati për strukturën dhe drejtimin e VLEN mbetet i hapur.

35

SONDAZHI

Cili është vlerësimi juaj për punën e Gjykatës Kushtetuese? 

Instrument i pushtetit të VMRO-DPMNE

Mbron Kushtetutën

Nuk kam mendim

• 
• 
• 
• 
• 
• 
•