Pse BDI mendon që qytetarët e Tetovës, Gostivarit dhe Kumanovës, po zhvaten nga shteti?
Botuar nga Flaka
Bashkimi Demokratik për Integrim ka publikuar sot një analizë të detajuar mbi ndikimin e rritjes së çmimeve të derivateve të naftës, duke akuzuar Qeverinë për mosndërhyrje në kohë.
Sipas të dhënave të prezantuara, konsumi i derivateve të naftës për transport në Maqedonia e Veriut arrin në rreth 720.000 ton në vit, apo rreth 60 milionë litra në muaj.
“Mosndërhyrja e Qeverisë po u kushton qytetarëve dhe bizneseve rreth 685 mijë euro në ditë, respektivisht mbi 5.15 milionë euro në javë”, thuhet në analizën e partisë.
Sipas BDI-së, vetëm në dy javët e fundit, qytetarët kanë paguar mbi 10 milionë euro më shumë për karburante, si pasojë e rritjes së çmimeve prej 21 denarë për litër.
Imrane Veliu Aliu thekson se kjo rritje ka goditur drejtpërdrejt qytetarët që udhëtojnë çdo ditë drejt Shkup.
“Qytetarët e Tetovës paguajnë rreth 600 euro më shumë në vit, ata të Gostivarit rreth 780 euro, ndërsa qytetarët e Kumanovës rreth 579 euro më shumë në baza vjetore”, deklaroi ajo.
Ajo shtoi se këto shifra janë alarmante dhe ndikojnë drejtpërdrejt në buxhetin familjar dhe standardin jetësor.
“Prandaj kërkojmë masa urgjente nga Qeveria për të mbrojtur qytetarët dhe ekonominë nga kjo barrë e papërballueshme”, përfundoi Imrane Veliu Aliu.
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
