Gjykata e Apelit ndryshoi dënimin për Vasil Jovanovin

Gjykata e Apelit ndryshoi dënimin për Vasil Jovanovin për prodhim dhe shitje të marihuanës dhe kokainës, nga masa edukative siç kishte vendosur më parë nga Gjykata Penale, në dënim me burg prej 3 vjet e 10 muaj.

Ky rast nxiti reagime të ashpra në opinion, pasi Jovanovi përplasi për vdekje 22-vjeçaren Frosina Kulakova. Gjykatësja Daniella Aleksovska Stojanovska më parë në aktgjykimin e saj kishte shkruar se Jovanovit, si një i rritur i ri, i jepet mundësia që ta korrigjojë gabimin e bërë pa pasoja më të rënda për të. Ky vendim i Stojanovskës po shqyrtohet nga një Komision i posaçëm të cilin e formoi Këshilli Gjyqësor. Vasil Jovanov ndërkaq është në paraburgim për shkak të aksidentit rrugor ku mbeti e vdekur Kulakova. Prokurori publik republikan Ljupço Kocevski më herët deklaroi se Jovanovi do të qëndrojë në paraburgim deri në fund, pasi bëhet fjalë për vepër penale të kryer me paramendim. /Alsat.mk