Qeveria emëron të besuarit: Fadil Xhelili në Gostivar, Bunjamin Kadriu në Vrapçisht
Botuar nga Flaka
Qeveria vendosi për emrat e të besuarve në katër komunat ku më 11 janar do të mbahen zgjedhje të reja pas mos arritjes së censusit.
Në krye të Gostivarit, për të besuarin e saj Qeveria e ka vendosur Fadil Xhelilin. Në Vrapçisht do të jetë Bunjamin Kadriu, në Qendër Zhupë Arjan Ibraim dhe në Mavrovë – Rostushë, Oner Jakupovski.
Sipas kalendarit zgjedhor, fushata zgjedhore për këto katër komuna fillon më 22 dhjetor dhe do të zgjasë deri në mesnatën e 9 janarit.
Ndërkohë, nga nesër fillon shqyrtimi publik i listës zgjedhore për votuesit e regjistruar në katër komunat ku do të përsëriten zgjedhjet për kryetar komune. Votuesit e Gostivarit, Vrapçishtit, Mavrovë Rostushës dhe Qendër Zhupës do të mund të shikojnë të dhënat e tyre në listën zgjedhore nga data 26 nëntor deri më 10 dhjetor. KSHZ-ja fton të gjithë ata që duan të ndryshojnë të dhënat e tyre, të bëjnë kërkesë në formë elektronike ose në zyrat rajonale të KSHZ-së. Institucioni për organizimin e zgjedhjeve gjithashtu bëri thirrje që qytetarët të paraqesin personat e afërt të familjes që nuk jetojnë më, për t’i shlyer nga lista zgjedhore.
“Njësitë dhe zyrat rajonale të KSHZ-së gjatë kohëzgjatjes së shqyrtimit publik do të punojnë çdo ditë, në periudhën nga ora 8 e mëngjesit, deri në ora 20 kurse më datë 10 dhjetor të vitit 2025, deri në ora 24. Gjatë kohëzgjatjes së shikimit publik qytetarët do të mund të parashtrojnë kërkesë për regjistrim, plotësim dhe shlyerje të të dhënave të listës zgjedhore që janë dhënë në shqyrtim publik”, deklaroi Abdush Demiri, Nënkryetar i KSHZ-së
Botuar nga Flaka
Thumbi sot
