VMRO DPMNE e do Strugë si Kërçovën dhe Bervenicën, s’ka marrëveshje për qeverisje

Botuar nga Flaka 2 Dhjetor, 2025 10:27 Përditësuar

Këshilli komunal i Strugës akoma pa kryetar. Kjo për shkak të mosmarrëveshjeve mes VMRO DPMNE-së dhe VLEN-it. Partia e Mickoskit nuk heq dorë nga kjo pozitë. Nga atje thonë se nëse deri më 3 dhjetor kur duhet të miratohet buxheti, nuk e marrin pozitën e kreut të Këshillit, atëherë do të largohen nga koalicioni me VLEN-in në nivel lokal.

“Kur të krijohen kushtet për shumicë dhe për zgjedhjen e kryetarit, atëherë do të realizohet”, tha Mite Stevoski – këshilltar i VMRO DPMNE-së.

Edhe nga VLEN-i në Strugë për Alsat thonë se për momentin nuk ka marrëveshje. Ende nuk janë ulur në një tryezë të përbashkët, por shpresojnë që shumë shpejt të ketë ndonjë zgjidhje. Nëse jo, thonë se janë të përgatitur të shkojnë në zgjedhje të parakohshme në Strugë”.

Sipas këshilltarit të LSDM-së, Dimçe Shipinkaroski, problemi është politik, ndërsa përgjegjësia është te ata që e kanë formuar koalicionin dhe e kanë marrë drejtimin e komunës. Ai thotë se pozicioni i LSDM-së është i qartë , mbështesin një proces politik që është transparent, parimor dhe i arsyetuar publikisht, dhe se ata nuk do të marrin pjesë në marrëveshje të bëra fshehurazi, pa program të qartë dhe pa përgjegjësi ndaj publikut. Nëse deri në mars nuk votohet buxheti për vitin 2026, atëherë ligji parasheh zgjedhje të reja për këshilltarë. VMRO DPMNE dhe VLEN në Këshillin e Strugës Bashkë kanë 10 këshilltarë.

Kujtojmë që në mbledhjen e dytë të Këshillit Komunal të Kërçovës, të mbajtur ditën e djeshme, u përcaktua përbërja e 11 komisioneve punuese të këshillit. Megjithëse shqiptarët përbëjnë shumicën në këtë komunë dhe kanë 10 këshilltarë në përbërjen aktuale të këshillit, vetëm 4 nga 11 komisionet do të drejtohen nga përfaqësues shqiptarë.

Kundër kësaj ndarjeje reaguan këshilltarët e Listës së Pavarur, Kujtim Kasami, dhe e Aleancës për Integrim (AKI), Syarta Saliu Osmani. Ata theksuan se vendimi nuk pasqyron realitetin demografik dhe politik të Kërçovës, duke nënvizuar se përfaqësimi në komisione duhet të jetë proporcional dhe në përputhje me Ligjin për Vetëqeverisje Lokale.

Sipas tyre, mënyra e formimit të komisioneve përmban elemente të hapura të diskriminimit ndaj shumicës shqiptare në Kërçovë.

“Kur në këshill ka 10 këshilltarë shqiptarë dhe 9 maqedonas, është e papranueshme që vetëm 4 komisione të drejtohen nga shqiptarët. Kjo bie ndesh me ligjin dhe me çdo parim të përfaqësimit të drejtë”, kanë deklaruar ata.

Nga koalicioni VLEN, që gjithashtu ka përfaqësues shqiptarë në Këshillin Komunal e që është në koalicion me VMRO-në, nuk është shënuar asnjë reagim rreth kësaj çështjeje, duke shkaktuar pakënaqësi në opinionin lokal për mungesën e qëndrimit publik në një vendim që prek drejtpërdrejt pozicionin politik të shqiptarëve në Kërçovë. Gazeta Flaka

Botuar nga Flaka 2 Dhjetor, 2025 10:27 Përditësuar

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Marrja e paautorizuar e teksteve dhe videove me të drejtë autoriale ose ndonjë përmbajtje të ngjashme pa pëlqimin paraprak me shkrim të Flaka Media do të konsiderohet shkelje e të drejtave autoriale dhe për këtë Flaka e ruan të drejtën të kërkojë kompensim përkatës monetar.Mosrespektimi dhe abuzimi i të drejtave autoriale dhe të drejtave simotër dënohet me ligj.Çdo marrje e paautorizuar, shfrytëzim, përdorim apo publikim i tekstit, fotografitë ose videot apo çfarëdo përmbajtje tjetër e ngjashme që paraqet pronësi të Flaka Media, pa pëlqim paraprak me shkrim nga redaksua, ndalohet rreptësisht dhe për të njëjtën paguhet kompensim përkatës financiar, për çka pronari ka të drejtë të nis procedurë përkatëse.Në rast të marrjes së teksteve autoriale dhe videove apo çfarëdo përmbajtje tjetër, në mënyrë të obligueshme nevojitet pëlqim paraprak nga Flaka Media dhe vendosje të linkut që do të çojë deri në web faqen e Flaka Media. Shkrimet nga MGID, nuk janë në menaxhim të redaksisë.