Ndahet nga jeta Dr. Ferit Sadiku, ngushëllime familjes së të ndjerit

Me dhembje të thellë u njoftua lajmi për ndarjen nga jeta të Dr. Ferit Sadikut, kardiologu i parë në Gostivar, ish-deputet dhe Qytetar Nderi i qytetit. Ai do të mbahet mend për profesionalizmin, përkushtimin dhe kontributin e tij të çmuar në shëndetësi dhe shoqëri.

Valdet Xhaferi, kryetar i komunës së Gostivarit, deklaroi:
“Me dhimbje të thellë morëm lajmin për ndarjen nga jeta të Dr. Ferit Sadikut – kardiologu i parë, ish-deputet dhe Qytetar Nderi i Gostivarit. Ai do të kujtohet për profesionalizmin, përkushtimin dhe kontributin e çmuar ndaj shëndetësisë dhe shoqërisë sonë. Qoftë i përjetshëm kujtimi i tij. Zoti e mëshiroftë dhe i faltë Xhenetin. Ngushëllime familjes, miqve dhe gjithë atyre që e njohën.”

Edhe Valbon Limani shprehu trishtimin e tij:
“Lajmi për ndarjen nga jeta të Dr. Ferit Sadikut ka trishtuar sot qytetin tonë. Axha Ferit ishte kardiologu ynë i parë, ish-deputet dhe Qytetar Nderi i Gostivarit. Qoftë i përjetshëm kujtimi i tij! Zoti i faltë Xhenetin.”

Arben Taravari shtoi:
“Doktor Ferid Sadiku ka ndërruar jetë. Ai ishte kardiologu i parë në Gostivar, një njeri i jashtëzakonshëm që ndihmoi mijëra vetë. Në vitin 2021 u shpall Qytetar Nderi i Gostivarit dhe sot i japim lamtumirën me nderimet që i bëhen një Qytetari Model! Lamtumirë i dashur Dr. Ferid… sot i bashkohesh babës tim, me të cilin ishit aq të ngushtë në këtë jetë, tash jeni në Përjetësi.”

Muftinia e BFI-së në Gostivar u shpreh me këto fjalë:
“Të All-llahut jemi dhe vetëmse tek Ai është kthimi jonë! Sot, me dhembje të thellë, por me besim të fuqishëm në Zot, u nda nga jeta Dr. Ferid Sadiku, një ndër mjekët më të njohur të vendit tonë dhe më gjerë, kardiologu i parë shqiptar dhe ish-deputet i Kuvendit. Në emër të Muftinisë së BFI-Gostivar, Muftiut të saj H. Sabahudin ef. Zendeli, nëpunësve fetarë dhe mbarë besimtarëve të territorit të saj, lusim All-llahun xh.sh. që merhumin ta gradojë me Xhennet, familjes dhe të afërmve t’ju jep durim të pashoq. All-llahu e shpërbleftë me mirësitë e Ahiretit!”

Nga Spitali i Gostivarit, në emër të drejtorit, Sub.Spec. Emri Bajrami, dhe të gjithë të punësuarve, shprehën ngushëllimet më të sinqerta familjes për ndarjen nga jeta të Dr. Ferid Sadikut, kardiolog i njohur dhe koleg i nderuar.

“Sot ka ndërruar jetë një mjek i përkushtuar, profesionist i dalluar dhe humanist i madh, i cili me punën dhe përkushtimin e tij dha një kontribut të jashtëzakonshëm për Spitalin e Gostivarit dhe për qytetarët e Gostivarit me rrethinë. Dr. Ferid Sadiku do të kujtohet gjithmonë për humanizmin, dijen dhe përkushtimin e tij ndaj pacientëve dhe kolegëve. Qoftë i përjetshëm kujtimi për të, përfundon ngushëllimi.

Ngushëllime të sinqerta i shpreh edhe redaksia e Flaka:
“Ngushëllime familjes, miqve dhe gjithë qytetarëve të Gostivarit për humbjen e një figure kaq të shquar të mjekësisë dhe shoqërisë sonë.”

Dr. Ferit Sadiku do të mbahet mend si një figurë e shquar në shëndetësi, si profesionist i palodhur dhe qytetar i përkushtuar ndaj komunitetit të tij. Gazeta Flaka