Blerim Mustafi falënderon publikisht Abedin Bilallin për kontributin në TV Globi
Botuar nga Flaka
Pronari i TV Globi, Blerim Mustafi, ka përcjellë një mesazh publik falënderimi dhe vlerësimi për bashkëpunëtorin e tij Abedin, duke theksuar kontributin profesional dhe njerëzor të tij ndër vite.
“Ka njerëz që lënë gjurmë jo sepse duhet, por sepse dinë të japin nga vetja me zemër. Ti je një prej tyre”, shprehet Mustafi në mesazhin e tij.
Ai thekson se Abedini nuk ka qenë vetëm një punëtor i përkushtuar, por mbi të gjitha një njeri i madh dhe shok i vërtetë. Sipas Mustafit, puna, ndershmëria dhe korrektësia e tij kanë qenë shembull për të gjithë kolektivin.
“Kontributi yt nuk matet vetëm me atë që ke bërë, por me mënyrën si e ke bërë — me zemër të pastër, respekt për secilin dhe shpirt të madh”, thuhet në mesazh.
Mustafi vlerëson edhe rolin mbështetës të Abedinit në momentet e vështira, duke theksuar se prania dhe fjalët e tij kanë dhënë forcë dhe shpresë.
“Falë teje, vendi i punës ka qenë më shumë se një detyrë e përditshme — ka qenë një hapësirë njerëzore, e mbushur me miqësi dhe respekt të vërtetë”, thekson ai.
Në fund, Blerim Mustafi i uron Abedinit shëndet, paqe dhe gëzim në rrugëtimin e ardhshëm, duke shprehur bindjen se ai do të mbetet i njëjti njeri i mirë dhe i drejtë kudo që të jetë.
“Të falënderojmë nga zemra për gjithçka që ke dhënë dhe për gjurmën e bukur që ke lënë tek secili prej nesh”, përfundon mesazhi.
Gazetari Abedin Bilalli ka njoftuar largimin e tij nga Televizioni Globi, duke mbyllur një kapitull të rëndësishëm të jetës profesionale. Përmes një reagimi publik, Bilalli vlerëson kohën e kaluar në Globin si një nga përvojat më cilësore, si në plan personal ashtu edhe profesional.
Ai thekson se, ndonëse nuk është më pjesë e këtij televizioni, do ta mbajë gjithmonë me respekt përvojën e fituar, bashkëpunimin me kolegët dhe mundësinë për rritje profesionale përmes sfidave dhe kritikës së ndershme.
Një falënderim i veçantë u drejtohet kolegëve dhe bashkëpunëtorëve, ndërsa përmend në mënyrë të veçantë drejtorin Blerim Mustafi, të cilin e cilëson jo vetëm si drejtues, por edhe si mik, duke vlerësuar misionin e Globit për kontribut shoqëror.
Bilalli njofton se ka vendosur të ndjekë një rrugë të re përmes migrimit, një vendim që, sipas tij, mund të gjykohet, por që vjen si pasojë e realitetit të vështirë dhe jo e planeve personale. Ai thekson se nuk fajëson askënd për këtë zgjedhje dhe u uron sukses kolegëve të tij gazetarë, me thirrjen që secili të kontribuojë për ta bërë vendin më të mirë.
Abedin Bilalli ka qenë i angazhuar në portalin Flaka për dhjetë vite, nga viti 2015 deri në vitin 2025. Ai ka përfunduar Fakultetin e Gazetarisë në Universitetin e Tetovës dhe gjatë karrierës së tij ka punuar në TV Globi dhe Flaka, duke qenë i përfshirë në dhjetëra projekte dhe seminare profesionale.
Gjatë angazhimit mediatik, Bilalli ka realizuar qindra reportazhe, emisione dhe dokumentarë, duke dhënë kontribut të vazhdueshëm në informimin e opinionit publik.
Largimi i tij i shtohet listës së gazetarëve që po e braktisin profesionin dhe vendin, në një realitet ku media gjithnjë e më pak arrin t’i mbajë profesionistët e saj. Gazeta Flaka
Botuar nga Flaka
TË fundit
