Gjykata e Apelit konfirmon aktgjykimin ndaj Selmanit, reagime për lirinë e fjalës

Gazetari Naser Selmani ka njoftuar se Gjykata e Apelit ka konfirmuar vendimin e Gjykatës Civile në Shkup, me të cilin ai është shpallur fajtor për shpifje dhe fyerje ndaj një televizioni kombëtar dhe drejtorit të tij.

Sipas vendimit, Selmani nuk ka arritur të dëshmojë në gjykatë pretendimet se “mediat ende kontrollohen nga partitë dhe qeveria” dhe se “drejtori i televizionit ushtron presion mbi gazetarët”.

Ai rikujton se në vitin 2023, drejtori i të njëjtit televizion ishte përfshirë drejtpërdrejt në një emision debativ, duke tentuar fillimisht të largojë një mysafir dhe më pas duke urdhëruar ndërprerjen e emisionit.

Gjykata nuk ka caktuar dëmshpërblim financiar, por e ka obliguar Selmanin të paguajë shpenzimet e avokatëve të paditësve dhe të publikojë një pjesë të aktgjykimit në një gazetë ditore.

Selmani thekson se e bën publik këtë informacion jo për arsye personale, por sepse konsideron se vendimi mund të ketë pasoja serioze për lirinë e shprehjes në Maqedoninë e Veriut, nëse nuk reagohet me kohë.

Ai vlerëson se padia duhej të ishte rrëzuar, duke iu referuar praktikës së Gjykata Evropiane për të Drejtat e Njeriut në Strasburg, sipas së cilës çështjet që prekin interesin publik duhet të gëzojnë mbrojtje më të gjerë.

Selmani paralajmëron se padi të tilla përdoren si mjete për frikësim dhe heshtje të zërave kritikë, duke krijuar efekt dekurajues ndaj debatit publik. Ai përmend edhe Rekomandimin CM/Rec(2024)2 të Këshilli i Evropës, që synon luftimin e padive strategjike kundër pjesëmarrjes publike.

Në fund, ai u bën thirrje organizatave të gazetarëve – përfshirë Shoqatën e Gazetareve të Maqedonisë, Sindikatën e Gazetarëve dhe South East European Media Organisation – si dhe përfaqësive diplomatike të BE-së, SHBA-së, Gjermanisë, Francës dhe Mbretërisë së Bashkuar në Shkup, që ta ndjekin nga afër këtë praktikë gjyqësore, të cilën ai e konsideron shqetësuese për një vend anëtar të NATO-s dhe kandidat për anëtarësim në BE.

Redaksia e Flaka shpreh solidaritet të plotë me kolegun Naser Selmani pas vendimit të Gjykatës së Apelit, duke vlerësuar se çdo aktgjykim që prek lirinë e shprehjes dhe debatin për çështje me interes publik duhet të trajtohet me kujdes maksimal dhe në përputhje me standardet evropiane për lirinë e medias. Gazeta Flaka

182

SONDAZHI

 Si e vlerësoni punën e ministrit Fatmir Limani?

Shumë mirë

Mirë

Aspak mirë

• 
• 
• 
• 
• 
• 
•