Ademi: Kur tolerohet urrejtja, futbolli kthehet në arenë politike

Nënkryetari i Bashkimi Demokratik për Integrim (BDI), Arbër Ademi, ka reaguar pas dy incidenteve të fundit në futbollin vendor, duke i cilësuar ato si pasojë të drejtpërdrejtë të mosndëshkimit dhe tolerimit institucional.

Ademi theksoi se ngjarjet e ndodhura në ndeshjen mes FK Vardar dhe KF Bashkimi, si dhe në takimin ndërmjet KF Shkëndija e Haraçinës dhe KF Prespa, nuk janë të izoluara.

“Dy incidente të rënda në futbollin tonë nuk janë rastësi, por janë pasojë direkte e mosndëshkimit dhe e inkurajimit të heshtur që u bëhet atyre që shkelin rregullat dhe nxisin urrejtje,” deklaroi Ademi.

Sipas tij, në ndeshjen mes Vardarit dhe Bashkimit është toleruar “gjuhë e hapur e urrejtjes” dhe madje janë përdorur njësi speciale kundër përfaqësuesve të klubit të Bashkimit, ndërkohë që loja ka vazhduar normalisht.

“Kur në një ndeshje mes Vardarit dhe Bashkimit tolerohet gjuhë e hapur e urrejtjes dhe madje përdoren njësi speciale kundër përfaqësuesve të klubit të Bashkimit, ndërsa loja vazhdon sikur asgjë të mos ketë ndodhur, atëherë mesazhi është i qartë: standardet nuk vlejnë njësoj për të gjithë,” u shpreh ai.

Ademi përmendi edhe rastin e dytë, ku sipas tij, në ndeshjen mes Shkëndijës së Haraçinës dhe Prespës është kërkuar largimi i flamurit shqiptar me arsyetimin se “ka urdhër nga lart”.

“Kur në një tjetër ndeshje kërkohet largimi i flamurit shqiptar me arsyetimin se ‘ka urdhër nga lart’, edhe pse ligji e rregullon përdorimin e simboleve, bëhet e qartë se problemi nuk është sportiv, por politik,” theksoi Ademi.

Ai akuzoi se mungesa e përgjegjësisë po krijon precedent të rrezikshëm.

“Këto devijime po përsëriten sepse askush nuk mban përgjegjësi. Përkundrazi, ata që veprojnë në këtë frymë jo vetëm që nuk sanksionohen, por shpesh avancohen e privilegjohen, për sa kohë janë në vijën e kësaj qeverie të udhëhequr nga VMRO-DPMNE dhe vazalët e tyre, e cila po kultivon një klimë ku shqiptarët trajtohen si qytetarë të dorës së dytë,” deklaroi nënkryetari i BDI-së.

Në fund, Ademi theksoi se çështja tashmë tejkalon kufijtë e rivalitetit sportiv.

“Kjo nuk është më çështje rivaliteti sportiv, por çështje dinjiteti dhe barazie. Nëse institucionet e futbollit nuk distancohen nga diktati politik dhe nuk vendosin standarde të barabarta për të gjithë, atëherë besimi në garën e ndershme do të zëvendësohet me bindjen se rezultati përcaktohet jashtë fushës,” përfundoi ai. Gazeta Flaka

63

SONDAZHI

Sa e qëndrueshme është bashkëpunimi mes partive në Koalicionin VLEN?

Bashkëpunimi lëkundet

Bashkëpunimi është i qëndrueshëm

• 
• 
• 
• 
• 
• 
•