BDI: Hajde, menjëherë të shkojmë në zgjedhje të parakohshme parlamentare!
Botuar nga Flaka
Konkluza kryesore nga mbledhja e sotme e Kryesisë Qendrore të Bashkimit Demokratik për Integrim ishte e qartë dhe unanime: Të shkohet menjëherë në zgjedhje të parakohshme parlamentare!
Ky konstatim është i përbashkët edhe i të gjithë partnerëve brenda Besëlidhjes Aleanca Kombëtare për Integrim, të cilët vlerësojnë se pas tre palë zgjedhjesh radhazi, presidenciale, parlamentare dhe lokale, vullneti i qytetarëve është i qartë, i pandryshuar dhe në mbështetje të AKI-së.
Për më pak se një vit e gjysmë, qytetarët në Republikën e Maqedonisë së Veriut i kanë dhënë tre herë radhazi besimin e tyre Aleancës Kombëtare për Integrim, duke e bërë atë fituesen e padiskutueshme në rrafshin kombëtar.
Në zgjedhjet lokale të mbajtura të dielën, AKI ka konfirmuar edhe një herë epërsinë e saj politike e kombëtare. Faktet janë kokëforta dhe të pamohueshme:
• Në zgjedhjet për Këshilla Komunalë, AKI ka një epërsi prej mbi 23.000 votash në nivel kombëtar;
• Në garën për Kryetarë Komunash, diferenca është mbi 21.000 vota në favor të AKI-së;
• Në raportin e numrit të këshilltarëve, AKI ka 159 këshilltarë, përkundrejt 122 të kampit tjetër politik;
• Dhe, nëse zgjedhjet parlamentare do të mbaheshin po atë ditë, AKI do të kishte 20 mandate, kundrejt 15 të rivalëve politikë.
Në zgjedhjet për Këshilla Komunalë, Aleanca Kombëtare për Integrim ka fituar në shumicën dërmuese të komunave, përfshirë në: Bogovinë, Vrapçisht, Gostivar, Likovë, Pllasnicë, Saraj, Strugë, Studeniçan, Çashkë, Butel, Veles, Gazi Babë, Zelenikovë, Jegunovcë, Krushevë, Kumanovë, Resnjë, Studeniçan, Çuçer Sandevë, Shuto Orizare, Karposh, Mavrovë dhe Rostushë, me gjithsej 159 këshilltarë.
Në zgjedhjet për Kryetarë Komunash, Aleanca Kombëtare për Integrim ka fituar 5 komuna: Gostivar, Likovë, Vrapçishtë, Pllasnicë dhe Çashkë, ndërsa shkon në balotazh në 5 komuna të tjera, përfshirë Tetovën, Kërçovën, Strugën, Bogovinën dhe Studeniçanin.
Në këtë kontekst, Bashkimi Demokratik për Integrim vlerëson se zgjidhja e vetme për stabilitetin politik dhe institucional të vendit janë zgjedhjet e parakohshme parlamentare.
Qytetarët kanë shprehur vullnetin e tyre tri herë radhazi dhe çdo tentim për ta anashkaluar këtë realitet është i pakuptimtë dhe antidemokratik.
BDI kërkon që mandati t’u kthehet qytetarëve. Le të vendosë populli kush e ka legjitimitetin për të udhëhequr vendin dhe për ta çuar përpara procesin euroatlantik, përfaqësimin e barabartë dhe stabilitetin politik.
VLEN vuan nga sindromi i Gazimestanit, flet me patetikë, por humb me fakte. Ndërsa Aleanca Kombëtare për Integrim flet me shifra, me rezultate dhe me legjitimitet të konfirmuar në çdo cikël zgjedhor.
Aleanca Kombëtare për Integrim është fituese në rrafshin kombëtar. Qytetarët kanë folur qartë. Tani është koha që politika të dëgjojë.
Hajde, menjëherë të shkojmë në zgjedhje të parakohshme parlamentare!
Botuar nga Flaka
TË fundit
