SHBA nis hetimin e 2.4 milionë automjeteve Tesla pas përplasjeve të raportuara si shkak i softuerit Full-Self Driving

Agjencia e sigurisë rrugore e qeverisë amerikane ka hapur një hetim për 2.4 milionë automjete Tesla me softuerin Full Self-Driving të prodhuesit të automjeteve pas katër përplasjeve të raportuara, duke përfshirë një përplasje fatale.

Bëhet e ditur se Administrata Kombëtare e Sigurisë së Trafikut në Autostrada (NHTSA) po nis një vlerësim paraprak pas katër raporteve të përplasjeve ku Full Self-Driving ishte e përfshirë.

“Në një aksident Tesla goditi për vdekje një këmbësor”, tha NHTSA.

Hetimi mbulon automjetet Model S dhe X 2016-2024 me sistemin opsional si dhe automjetet Model 3 2017-2024, Model Y 2020-2024 dhe Cybertruck 2023-2024.

Vlerësimi paraprak është hapi i parë përpara se agjencia të kërkojë tërheqjen e automjeteve nëse beson se ato përbëjnë një rrezik për sigurinë, shkruan the Guardian.

Ndërkohë, Tesla thotë në faqen e saj të internetit se softueri Full Self-Driving në automjete kërkon mbikëqyrje aktive të shoferit dhe nuk i bën ato autonome.

Megjithatë, NHTSA tha se “rishikimi do të vlerësojë kohën, qëllimin dhe aftësitë e çdo përditësimi të tillë, si dhe vlerësimin e Tesla-s për ndikimin e tyre të sigurisë”.

Ndryshe, teknologjia FSD e Tesla ka qenë në zhvillim prej vitesh dhe synon automatizimin e lartë, ku automjeti mund të përballojë shumicën e detyrave të drejtimit pa ndërhyrjen njerëzore.

Por, ajo është përballur me shqyrtimin ligjor, me të paktën dy aksidente fatale që përfshijnë teknologjinë, duke përfshirë një incident në prill, në të cilin një Tesla Model S ishte në modalitetin e Full Self-Driving kur goditi dhe vrau një motoçiklist 28-vjeçar.