Kërçovë, mbahen takimet poetike “Hyjnesha Ilire Thana” 

Me mbështetjen e komunës së Kërçovës gjatë dy ditëve të kaluara në Kërçovë u mbajtën takimet poetike ndërkombëtare “Hyjnesha Ilire Thana” të organizuara nga klubi i shkrimtarëve shqiptarë “Penestia” për 10 vite me radhë, ku morën pjesë krijues nga Maqedonia, Kosova, Shqipëria dhe diaspora.

Manifestimi jubilar “Hyjnesha Ilire Thana”, me traditën e tij të organizimit 10-vjeçar, ka krijuar afërsinë e duhur në mes krijuesve dhe dashamirëve të fjalës së shkruar, potencoi kryetari i Klubit të shkrimtarëve “Penestia”, Adem Xheladini, i cili pasi i përshëndeti krijuesit që kishin ardhur nga të gjitha hapësirat shqiptare, por edhe nga Zvicra, Greqia, Italia dhe Franca, i shprehu mirënjohje kryetarit të komunës së Kërçovës, Fatmir Dehari, për mbështetjen e vazhdueshme që i dha këtij manifestimi gjatë periudhës 10-vjeçare të organizimit.

Në mbrëmjen e fundit të këtij manifestimi tradicional që mbështetet nga komuna e Kërçovës u promovua përmbledhja “Antologjia e poetëve kërçovarë” dhe vepra poetike “Dashuri në heshtje” e autores kërçovare, Dashurie Dalipi.

Në këtë mbrëmje të organizimit jubilar të takimeve “Hyjnesha Ilire Thana”, organizatori i ndau mirënjohje kreut të Kërçovës, Fatmir Dehari dhe krijuesve që dhanë kontribut të çmuar gjatë dekadës së fundit me prezantimet e krijimtarisë tyre poetike në Kërçovë.