Sllovakia, Hungaria dhe Serbia bëhen bashkë kundër migracionit të paligjshëm

Botuar nga Driton Zenku 21 Tetor, 2024 20:46

Udhëheqësit e Sllovakisë, Hungarisë dhe Serbisë do të takohen të martën për të diskutuar mbrojtjen e kufijve të Bashkimit Evropian kundër migracionit të paligjshëm, ka bërë të ditur të hënën zyra e qeverisë sllovake.

Kryeministri sllovak, Robert Fico dhe kryeministri hungarez, Viktor Orban, të cilët prej kohësh kanë mbajtur qëndrime të ashpra kundër migracionit, do të takohen me presidentin serb, Aleksandar Vuçiq në Komarno të Sllovakisë për të diskutuar mënyrat për të luftuar flukset e paligjshme, raporton Reuters.

Bashkëpunimi me Serbinë dhe shtetet e tjera të Ballkanit Perëndimor është kyç për frenimin e flukseve të paligjshme të migracionit, sipas zyrës së qeverisë sllovake. Kjo përfshin masa për forcimin e mbrojtjes së kufijve, mbështetjen e procedurave të azilit të vendeve partnere dhe përafrimin e politikës së vizave me Bashkimin Evropian.

“Një zgjidhje novatore mund të jenë qendrat e jashtme, të ashtuquajturat ‘hotspots’ për përpunimin e kërkesave për azil jashtë BE-së, që aktualisht po vihet në praktikë, për shembull, nga Italia në bashkëpunim me Shqipërinë”, ka thënë zyra.

Italia ka arritur një marrëveshje që emigrantët të procedohen teksa qëndrojnë në Shqipëri, një skemë që disa vende evropiane kanë thënë se mund të përdoret si model.

Udhëheqësit e BE-së u takuan javën e kaluar dhe ranë dakord të përdorin të gjithë fuqinë e tyre për të përshpejtuar kthimin e atyre që hyjnë ilegalisht në bllok.

Serbia, e cila nuk është anëtare e BE-së, ka qenë prej kohësh një pikë hyrëse në bllok për migrantët që vijnë përgjatë rrugës ballkanike nga Lindja e Mesme dhe Afrika e Veriut.

Por numri i kalimeve të paligjshme në Ballkanin Perëndimor ka rënë për 79% në nëntë muajt e parë të këtij viti, sipas të dhënave të agjencisë kufitare “Frontex”.

Që nga qershori, të dhënat nga policia e Hungarisë tregojnë një rritje të numrit të emigrantëve të paligjshëm të ndaluar para ose pas kalimit të kufirit, me shifrat javore që rriten në qindra.

Numri më i madh i ndalesave u raportua në fund të shtatorit, kur 531 persona u penguan të kalojnë kufirin ilegalisht dhe 394 persona u ndaluan brenda kufijve të Hungarisë dhe u kthyen në Serbi.

Botuar nga Driton Zenku 21 Tetor, 2024 20:46

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Marrja e paautorizuar e teksteve dhe videove me të drejtë autoriale ose ndonjë përmbajtje të ngjashme pa pëlqimin paraprak me shkrim të Flaka Media do të konsiderohet shkelje e të drejtave autoriale dhe për këtë Flaka e ruan të drejtën të kërkojë kompensim përkatës monetar.Mosrespektimi dhe abuzimi i të drejtave autoriale dhe të drejtave simotër dënohet me ligj.Çdo marrje e paautorizuar, shfrytëzim, përdorim apo publikim i tekstit, fotografitë ose videot apo çfarëdo përmbajtje tjetër e ngjashme që paraqet pronësi të Flaka Media, pa pëlqim paraprak me shkrim nga redaksua, ndalohet rreptësisht dhe për të njëjtën paguhet kompensim përkatës financiar, për çka pronari ka të drejtë të nis procedurë përkatëse.Në rast të marrjes së teksteve autoriale dhe videove apo çfarëdo përmbajtje tjetër, në mënyrë të obligueshme nevojitet pëlqim paraprak nga Flaka Media dhe vendosje të linkut që do të çojë deri në web faqen e Flaka Media.