KE-ja kërkon nga Serbia që të përmirësojë në mënyrë të dukshme situatën e shqiptarëve në Luginën e Preshevës

Botuar nga Driton Zenku 31 Tetor, 2024 20:56

Në raportin për vitin 2024 të Komisionit Evropian (KE) për Serbinë, një pjesë i është kushtuar edhe çështjes së pakicave kombëtare, duke përmendur veçanërisht çështjen e pasivizimit të adresave të shqiptarëve në Luginën e Preshevës – Preshevë, Medvegjë dhe Bujanoc – dhe nënpërfaqësimin e tyre në institucionet shtetërore të Serbisë

“Anëtarët e pakicës kombëtare shqiptare kanë ngritur shqetësime për mënyrën se si policia kontrollon statusin e vendbanimeve në pjesën jugore të Serbisë, duke rezultuar në ‘pasivizimin’ e disa adresave. Është e nevojshme që autoritetet t’i shpjegojnë më mirë publikut se si kryhen këto kontrolle”, ka thënë KE-ja në Raportin e Progresit.

Shqiptarët e Luginës së Preshevës e kanë ngritur zërin kundër diskriminimit që përjetojnë çdo ditë në Serbi. Ata kanë kërkuar të integrohen nëpër institucionet shtetërore të Serbisë, por edhe të zgjidhet çështja e pasivizimit të adresave – kërkesa që janë përfshirë edhe në planin e veprimit prej shtatë pikash, por që nuk është miratuar.

“Zbatimi i planit të veprimit për përmirësimin e përfaqësimit të shqiptarëve në institucione duhet të përshpejtohet dhe të çojë në përmirësime të prekshme”, ka konstatuar KE-ja në Raportin e Progresit për Serbinë, duke kujtuar se pakicat kombëtare mbeten të nënpërfaqësuara në institucionet shtetërore të Serbisë.

Gjithashtu, raporti ka evidentuar edhe gjuhën e urrejtjes në media, përfshrirë nga deputetët e Kuvendit të Serbisë, kundër pakicave kombëtare. Në raport është përmendur edhe çështja e gjuhëve të pakicave kombëtare, krahas rëndësisë së funksionimit të duhur dhe pavarësisë së këshillave të pakicave kombëtare në Serbi. (AP)

Botuar nga Driton Zenku 31 Tetor, 2024 20:56

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Marrja e paautorizuar e teksteve dhe videove me të drejtë autoriale ose ndonjë përmbajtje të ngjashme pa pëlqimin paraprak me shkrim të Flaka Media do të konsiderohet shkelje e të drejtave autoriale dhe për këtë Flaka e ruan të drejtën të kërkojë kompensim përkatës monetar.Mosrespektimi dhe abuzimi i të drejtave autoriale dhe të drejtave simotër dënohet me ligj.Çdo marrje e paautorizuar, shfrytëzim, përdorim apo publikim i tekstit, fotografitë ose videot apo çfarëdo përmbajtje tjetër e ngjashme që paraqet pronësi të Flaka Media, pa pëlqim paraprak me shkrim nga redaksua, ndalohet rreptësisht dhe për të njëjtën paguhet kompensim përkatës financiar, për çka pronari ka të drejtë të nis procedurë përkatëse.Në rast të marrjes së teksteve autoriale dhe videove apo çfarëdo përmbajtje tjetër, në mënyrë të obligueshme nevojitet pëlqim paraprak nga Flaka Media dhe vendosje të linkut që do të çojë deri në web faqen e Flaka Media.