Si ndryshojnë oraret e punës dhe pse fleksibiliteti është e ardhmja? Gjendja në Maqedoninë e Veriut!

Në realitetin e sotëm të punës, fleksibiliteti ka nisur të shndërrohet në një faktor kyç për kompanitë që duan të tërheqin dhe të mbajnë talente të larta, shkruan Flaka. Dita tradicionale e punës 9-në-5 ka marrë fund, duke u zëvendësuar me modele të ndryshme që u japin punonjësve autonomi dhe mundësi më të mëdha për të balancuar jetën profesionale me atë personale.

Çfarë janë oraret e punës me fleksibilitet?

Një orar fleksibël i punës u mundëson punonjësve të zgjedhin se kur, ku dhe si do të punojnë, brenda një kuadri të përcaktuar nga punëdhënësi. Këto modele ndryshojnë sipas nevojave dhe preferencave, duke sjellë përfitime të shumta për të dyja palët — punonjësit dhe bizneset.

Llojet kryesore të orareve fleksibël:

• Javë pune e ngjeshur: Konsiston në përqendrimin e orëve të punës në më pak ditë. Për shembull, punë 4 ditë nga 10 orë në vend të 5 ditëve nga 8 orë, duke lejuar fundjava më të gjatë.
• Flextime: Punonjësit zgjedhin orarin e fillimit dhe përfundimit brenda një intervali të caktuar, duke u përshtatur me ritmet e tyre natyrore dhe detyrimet personale.
• Puna në distancë: Lejon punë nga vendi që dëshirojnë, si shtëpia apo hapësira të ndryshme, falë zhvillimeve teknologjike.
• Puna me orar të shkurtuar (part-time): Reduktim i orëve javore për të përmbushur angazhimet personale apo familjare.

Përfitimet kryesore të orareve fleksibël

1. Rritja e produktivitetit: Kur punonjësit punojnë në kohët kur janë më energjikë dhe të fokusuar, rezultatet përmirësohen ndjeshëm.
2. Kursime dhe efikasitet: Kompanitë ulen shpenzimet e zyrave dhe mund të ofrojnë shërbime në orare më të gjera, duke rritur konkurrencën.
3. Shëndet dhe mirëqenie: Fleksibiliteti redukton stresin, përmirëson balancën punë-jetë dhe promovon një mënyrë jetese më të shëndetshme.

Rasti i Maqedonisë së Veriut: Një hap drejt fleksibilitetit në administratë

Qeveria e Maqedonisë së Veriut nga viti 2017 ka miratuar modele fleksibile për orarin e punës në sektorin publik, duke vendosur që punëtorët të fillojnë mes orarit 7:30-8:30 dhe të përfundojnë mes orarit 15:30-16:30. Në disa institucione si Drejtoria e të Hyrave Publike, Drejtoria e Doganave, Ministria e Brendshme dhe Ministria e Mbrojtjes, puna është organizuar me dy ndërrime (7:00-14:30 dhe 14:00-21:30) dhe përfshin edhe punën e së shtunës së parë të muajit.

Ky model është një shembull konkret i adoptimit të orareve fleksibël për të rritur efikasitetin dhe për të ndihmuar punonjësit të kenë një ekuilibër më të mirë jetësor.

Pse fleksibiliteti po bëhet standard?

Në një botë ku teknologjia dhe mënyrat e punës po ndryshojnë me shpejtësi, fleksibiliteti është një përgjigje natyrale ndaj nevojave të reja. Punonjësit kërkojnë më shumë liri dhe kontroll mbi kohën e tyre, ndërsa bizneset përfitojnë nga produktiviteti i rritur, motivimi më i lartë dhe kursimet e shpenzimeve.

Oraret fleksibël të punës nuk janë më një luks, por një domosdoshmëri për organizatat që duan të mbijetojnë dhe të lulëzojnë në epokën moderne. Rasti i Maqedonisë së Veriut tregon se edhe vendet me tradita më të ngurta mund të adaptohen dhe të përfitojnë nga ky model i suksesshëm. Flaka Media