Taravari: “VLEN nuk arriti të realizojë asnjë nga premtimet” – Arsyeja e largimit nga qeveria!

Kreu i Aleancës për Shqiptarët, Arben Taravari, një muaj më parë njoftoi tërheqjen e partisë së tij nga koalicioni qeverisës në Maqedoninë e Veriut. Në një intervistë ekskluzive për Euronews Albania, ai shpjegoi arsyet që qëndrojnë pas kësaj vendimmarrjeje.

Taravari theksoi se koalicioni VLEN, ku Aleanca për Shqiptarët ishte pjesë, nuk arriti të realizojë asnjë nga premtimet që i dha komunitetit shqiptar pas zgjedhjeve të fundit.

“Koalicioni VLEN u formua vitin e kaluar me pjesëmarrjen e katër partive, përfshirë Aleancën për Shqiptarët, duke marrë mbi 107 mijë vota. I premtuam shqiptarëve në RMV ndryshimin pas 22 viteve qeverisje të BDI dhe Ali Ahmetit. Por pas 11 muajsh, ky projekt u tregua i paqëndrueshëm dhe qytetarët janë të pakënaqur me ne,” u shpreh Taravari.

Ai shtoi se kishte dy mundësi: të heshtnin dhe të ruanin postet në qeveri, ku ai ishte ministër i Shëndetësisë, ose të reagonin ndaj situatës aktuale. “Ne zgjodhëm të reagojmë,” tha kreu i Aleancës për Shqiptarët, duke njoftuar largimin nga qeveria. Flaka Media