Barcelona kërkon një sulmues të majtë: Luis Díaz, Nico Williams apo Rashford?

Barcelona po përgatitet për të përforcuar repartin ofensiv dhe ka vendosur si prioritet afrimin e një sulmuesi të krahut të majtë. Sipas raportimeve të Mundo Deportivo, drejtuesit e klubit katalanas po shqyrtojnë tre alternativa të mundshme: Luis Díaz, Niko Williams dhe Marcus Rashford.

Luis Díaz, ylli i Liverpool-it, shihet si përforcimi ideal për skemën e trajnerit Hansi Flick. Kolumbiani është një lojtar i eksploziv dhe i aftë për të sjellë dinamizëm në repartin ofensiv, por kërkesat financiare të klubit anglez e bëjnë këtë operacion sfidues për Barcelonën.

Një tjetër emër shumë i vlerësuar në “Camp Nou” është Niko Williams. Sulmuesi i Atletik Bilbaos ka një klauzolë lirimi prej 60 milionë eurosh, çka përbën një pengesë për klubin katalanas. Megjithatë, Barcelona po shqyrton mundësinë e një marrëveshjeje në këste, për ta bërë transferimin më të realizueshëm.

Pista e tretë është Marcus Rashford, i cili mund të jetë një opsion më i lirë për Barcelonën. Manchester United nuk e sheh më si një lojtar kyç në projektin e tyre dhe Barcelona do të konsideronte një huazim me të drejtë blerjeje, por gjithçka varet nga gatishmëria e Rashford-it për të ulur pagën e tij. Thuhet se lojtari kishte pranuar një ulje pagash edhe në janar, gjë që mund ta lehtësojë një marrëveshje mes klubeve.

Pavarësisht alternativave të shumta, Barcelona ka një qëndrim të qartë: çdo lojtar që dëshiron të bashkohet me klubin duhet të lehtësojë transferimin. Drejtuesit katalanas janë në kërkim të marrëveshjes më të favorshme financiarisht, ndërsa trajneri Flick shpreson që një prej këtyre emrave të përfundojë në “Camp Nou” para fillimit të sezonit të ri.

Mbetet për t’u parë se cili nga këta tre sulmues do të jetë pjesë e projektit të Barcelonës për sezonin e ardhshëm.

Flaka