Flaka thumbon: VLEN rrethohet me “non grata”, por e gjen fajin te… non grata-t e tjerëve

Në një aksion të koordinuar të hipokrizisë ndërkombëtare, VLEN ka shpallur BDI-në si “parti non grata”, meqë dy prej eksponentëve të saj figurojnë në listën e zezë amerikane. Por ndërkohë, një analizë më e thellë e pozicionimit të VLEN-it tregon se ata janë si një NFT politik: të gjithë rreth tyre janë të skanuar nga OFAC, por vetë ata sillen si antivirus.

Në Maqedoni të Veriut, VLEN qeveris krah për krah me VMRO-DPMNE, një parti që nëse shënon emrin në Google, të del direkt “suggested: sanctions, blacklists, oligarks”. Por kjo s’ka rëndësi. Sepse sipas VLEN-it: “Kur non gratat janë tanët, janë reformatorë. Kur janë të tjerëve, janë tradhtarë.”

Në Shqipëri, VLEN përkrahu haptas Partinë Demokratike që drejtohet nga një lider non grata i përhershëm. Edhe kjo nuk është problem. Në fakt, duket se kanë një parim të artë: “VLEN për çdo non grata që i shkon për shtat”.

Në Kosovë, bashkëpunimi është edhe më epik: koordinim me një lider të sanksionuar dhe të izoluar ndërkombëtarisht – por që sipas VLEN-it, e përfaqëson “vullnetin e vërtetë të popullit” (ose të dikujt që flet fort në mikrofon).

Pra, të përmbledhim:
Qeveris me non grata
Mbështet non grata
Koordinon me non grata
Por BDI-në e shpall “non grata” sepse… dy vetë janë në listë!

Konkluzioni: VLEN ka bërë rreth vetes një kupolë “non grata” dhe shfaqet si shenjtori i vetëm në mes të klubit të të sanksionuarve.

Rubrika “Lajmi që s’na duhej” ju sjell këtë përplasje me logjikën politike, ku moraliteti është i përkohshëm dhe parimi i vetëm është: “na vlen kur na vlen!

“Lajmi që s’na duhej” është rubrikë satirike. Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja.”

(Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja)Flaka Media