Flaka thumbon: Stoçe Angelov: Ligji që s’duhet ta prishë VLEN-in, as të ndezë BDI-në

Në televizionin publik, në orën kur njerëzit prisnin lajme të rëndësishme, Stoçe Angelov hodhi një “bombë” politike që s’mund të quhet tjetër veçse… top sekret strategji!

Ai paralajmëroi se ligji për “Branitellat” – ata heronj që luftuan me njëri-tjetrin në vitin 2001 dhe që nuk përfshijnë ushtarët shqiptarë të UÇK-së – do të vonohet pas zgjedhjeve lokale, sepse, thotë ai, “nuk duam t’i prishim punë VLEN-it” dhe se “mos të kthehet BDI-ja”.

Pra, sipas Angelovit, më mirë të rrijmë me ligj në sirtar sesa të na kthehet ndonjë “terrorist” politik që dikur kishte armë në dorë dhe tani ka parti.

Në anën tjetër, lideri maqedonas që dikur luftoi me uniformën e Ushtrisë Maqedonase në vitin 2001, sot është një nga partnerët e koalicionit me VMRO-DPMNE dhe VLEN – një koalicion që duket më shumë si klub nate ku secili sheh kujt nuk duhet t’i dalë përpara sesa si një qeveri serioze.

Për ata që po pyesin: Po, është plotësisht serioze. Dhe po, është më shumë dramë se çdo serial politik.

Në fund, “strategjia sekrete” e Angelovit na thotë: Mos e nxjerr ligjin tani, se po e nxjerrim keq VLEN-in. Le të presim zgjedhjet lokale, sepse koalicioni nuk guxon t’i thotë “jo” BDI-së dhe as UÇK-së.

Nëse kjo nuk është definicioni i politikës së sotme shqiptaro-maqedonase, atëherë çfarë është?

Në anën tjetër, VLEN – që u betua për “dinjitet” – tani sillet si student në provim që nuk ka lexuar as gjysmë fletushke. Rrinë në bankë, tundin kokën, nuk bëjnë zë – vetëm të mos i heqin nga qeveria.

Burime konfidenciale nga qeveria thonë se përfaqësues të VLEN-it i kanë kërkuar Stoçes vetëm një gjë: “A mundet ligji të kalojë pas zgjedhjeve, që t’i mashtrojmë edhe një herë votuesit tanë?”

“Lajmi që s’na duhej” është rubrikë satirike. Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja.”

(Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja). Flaka Media