Flaka thumbon: Gafi i Fetait: I lutëm, i përzëmë, i akuzuam – rrethi politik i mbyllur “Made in VLEN”

Sheshi Skënderbeu nuk ishte mbrëmë vetëm skenë manifestimi, por edhe tribunë gafash politike. Arben Fetai, zëdhënësi zyrtar i “vetëlavdërimit strategjik”, nga podiumi i krenarisë, theu një rregull të vjetër të retorikës: Mos e përgënjeshtro vetveten në një fjali të vetme.

Me një qetësi prej doktrine, Fetai tha: “Ne i lutëm pafund Taravarin të mos dalë nga VLEN, pastaj e ftuan Selën t’i bashkohet VLEN-it, dhe sot i akuzojnë se shkuan te Ali Ahmeti për mbijetesë politike.”

Tani shtrohet pyetja: A po e pranon Fetai, pa dashje, se VLEN është në rrezik dhe drejt shuarjes? Sepse nëse je duke i lutur dikë të mos largohet, ndërkohë që ti vetë e quajte shtëpi politike, por edhe vend për “fundin” e tyre, atëherë çfarë është VLEN? Stacion i fundit për liderë shqiptarë? Apo një “expres politik” që del nga shina sa herë ndërron drejtim era”?

Përfundimisht, me këtë gafë, Fetai duket se e zbuloi atë që shumëkush e dyshonte: Vetëm larg VLEN-it mund të mbijetosh politikisht. Ose siç do e formulonte ai vetë në versionin politik të “Big Brotherit” – nëse qëndron brenda, je i eliminuar, nëse del jashtë, je finalist.

“Lajmi që s’na duhej” është rubrikë satirike. Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja.”

(Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja). Flaka Media