Përplasje në Alternativa: Akuza për hajni, hakerim dhe keqpërdorim tenderësh në Kumanovë

Një përplasje e ashpër verbale ka shpërthyer brenda partisë Alternativa, pas një mesazhi të publikuar në faqen zyrtare të partisë në Facebook, ku u hodhën akuza për vjedhje dhe keqpërdorime të tenderëve në Shtëpinë e Shëndetit në Kumanovë, transmeton Flaka. Mesazhi u publikua me firmën e Mensur Bajramit, gjë që shkaktoi reagime të shumta dhe polemika të brendshme në këtë subjekt politik.

“Zeqirija Ibrahimi dhe Bashkim Murtezi, dilni tregoni kush po vjedh edhe nga tenderat e Shtëpisë së Shëndetit në Kumanovë!”, thuhej në postimin e publikuar.

Pas këtij incidenti, Alternativa reagoi zyrtarisht, duke deklaruar se faqja e tyre është hakuar nga një person me emrin Mesut Bajrami dhe se rasti është paraqitur në Ministrinë e Punëve të Brendshme për hetim.

“Njoftojmë opinionin se faqja zyrtare e Alternativës është hakuar nga personi Mesut Bajrami. Rasti është paraqitur në organet kompetente. Theksojmë se personi në fjalë është i përjashtuar nga të gjitha organet e Alternativës dhe nuk ka asnjë lidhje me subjektin tonë”, thuhet në reagimin zyrtar të partisë.

Situata mori një tjetër kthesë kur faqja në Facebook ndryshoi emrin në “Hajnat e Alternativës”, duke ngritur edhe më shumë dyshime për konfliktet e brendshme.

Në anën tjetër, Mesut Bajrami, i cili është i njohur si anëtar i Alternativës në Kumanovë, demantoi pretendimet e partisë, duke thënë se faqja nuk është hakuar, por është krijuar dhe mirëmbajtur nga vetë ai.

“Faqja nuk është hakuar, por është hapur dhe është rritur e mirëmbajtur nga unë”, deklaroi Bajrami, duke shtuar me ironi: “T’fala Hajnave të Alternativës.”

Ky zhvillim nxjerr në pah tensionet e thella dhe mungesën e qartësisë në menaxhimin e brendshëm të Alternativës, veçanërisht në degën e saj në Kumanovë. Flaka Media