Baxhanaku bie nga lista, në trend dhëndri – Azir Aliu sërish angazhon dhëndrin në Ministrinë e Shëndetësisë
Botuar nga Flaka
Në kabinetin e Ministrisë së Shëndetësisë po fryn erë familjare. Ministri i Shëndetësisë, Azir Aliu, nuk ndalet së befasuari me mënyrën e tij kreative të menaxhimit të burimeve njerëzore: familja mbi të gjitha! Sipas burimeve nga vetë ministria, Aliu ka angazhuar në kabinet dhëndrin e tij, duke ndjekur shembullin e mëparshëm kur si ministër i Shoqërisë Informatike dhe Administratës, kishte punësuar pikërisht Dritan Dautin si shef kabineti, shkruan Flaka Media
Dhe siç duket, dashuria për dhëndurët është më e fortë se ligji për shërbim publik. Dautin e rikthen sërish, ose siç po thonë me shaka në korridoret e ministrisë: “kryedhëndri i punëve të mëdha”.
Sot në takim konstruktiv me shkëlqesinë e Tij z. Francesco Saverio Giusti, ambasador i Urdhrit Sovran Ushtarak të Maltës në Republikën e Maqedonisë së Veriut, Aziri u shoqërua nga dhëndri Dauti.
Dhe derisa në rrjetet sociale shqiptarët bënin humor me këngën e baxhanakut, duket se tani trendi ka ndryshuar – kënga e dhëndrit është hiti më i ri institucional. Po presim videoklipin…
Ironikisht, derisa publiku kërkon meritokraci dhe rini të pavarur në administratë, në disa kabinete vazhdon “politikani familjar” si model suksesi. Ndërsa për opozitën, ky rast përforcon kritikat për nepotizëm dhe “kapje vertikale të shtetit” – nga baxhanaku te dhëndri e pastaj kush vjen tjetër?
Për momentin, zyrtarisht nuk ka ndonjë deklaratë nga Azir Aliu lidhur me këtë formë “inovacione” në menaxhimin e stafit. Por një gjë është e qartë – aty ku ka dashuri familjare, ka edhe besim politik.
Në rastin e parë, Aliu mohoi akuzat për nepotizëm në ministrinë e tij. Aliu tha atëherë se shefi në kabinetin e tij nuk është dhëndër i tij, por i familjes së tij.
“Ai nuk është as dhëndër i vajzës, as dhëndër i motrës kështu që në mënyrë juridike mund ta kontrolloni dhe të parashtroni procedurë. Gjithçka është në rregull, nuk ka asnjëlloj nepotizmi, ai është dhëndër i familjes Aliu por jo dhëndri im”, tha Aliu në vitin 2023 me rastin e ministrisë së Shoqërisë Informatike dhe Administratës.
Botuar nga Flaka
Thumbi sot
