Flaka thumbon: Censura e Albin Kurtit: Fsheh takimin “vëllau për vëllaun” me Arben Fetain?

Në arkivin dixhital të Kryeministrisë së Kosovës, ka ndodhur një zhdukje misterioze: asnjë fotografi, asnjë postim, asnjë “like” nga takimi i Albin Kurtit me zëvendëskryeministrin për qeverisje të mirë të RMV-së, Arben Fetain.

Takimi ndodhi në Shkup, në kuadër të eventit të organizuar nga Qeveria e Maqedonisë së Veriut dhe Bashkimi Europian. Liderët ballkanikë diskutuan për “Planin e Rritjes”, ndërsa Kurti diskutoi gjithçka – përveç fotografisë me vëllain Arben.

Në faqen zyrtare të Kurtit, mungesa e këtij momenti ka ngritur më shumë pikëpyetje sesa plani i vetë rritjes. Publiku, i mësuar me përqafime strategjike dhe deklarata emocionale të stilit “jemi një komb, një rrugë, një status”, tani është i hutuar: A është bërë vëllai i vogël “seen” nga vëllai i madh?

Ndërkohë, Arben Fetai, në rolin e “vëllait të lënduar”, ka postuar foton me krenari në rrjetet e veta, shoqëruar me një caption evropian dhe të buzëqeshur. Por fotot në profilin e Fetait pa repost nga Kurti, janë njësoj si një “story” pa views.

Zyra e Kurtit nuk ka dhënë shpjegime. Disa ekspertë thonë se mund të jetë lëshim protokollar, ndërsa të tjerë flasin për njoftime të filtruar me algoritmin e heshtjes selective. Ndoshta fotografia është fshirë për të ruajtur ekuilibrin diplomatik me vëllain tjetër – atë që mund të jetë ende duke i pritur Kurtit një telefonatë.

Në mungesë të një sqarimi zyrtar, hipotezat vazhdojnë:

• A është kjo një provë e re e “dashurisë me kushte”?
• Apo thjesht Kurti ka harruar të buzëqeshë për kamerën?
• Apo ndoshta – ndoshta – nuk është më cool të jesh shumë “vëlla” publikisht?

Një gjë është e sigurt: nëse nuk është në Facebook, nuk ka ndodhur – dhe ky është lajmi që s’na duhej.

PS: Portalet e tjera mund ta kopjonë lajmin dhe e kanë gratis. Ma mirë ta marrin gati se sa të lodhen të na kopjonë me rubrika të ndajshme 😅

“Lajmi që s’na duhej” është rubrikë satirike. Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja.”

(Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja). Flaka Media