Gadaf Uzairi sfidon deputeten Mimoza Musa: A ke ndryshuar qëndrim apo thjesht dresin?

Sekretari organizativ i Aleancës për Shqiptarët, Gadaf Uzairi, ka reaguar në rrjetet sociale ndaj deputetes Mimoza Musa, duke e akuzuar për hipokrizi politike dhe ndryshim të qëndrimeve në varësi të interesit personal.

Përmes një deklarate publike të shpërndarë në rrjetet sociale, Uzairi i është drejtuar deputetës Mimoza Musa me pyetje të drejtpërdrejta, duke e sfiduar që të tregojë hapur nëse e ka ndryshuar qëndrimin ndaj qeverisë që ajo vetë – sipas tij – më parë e kishte quajtur “anti-shqiptare”.

“Mimoza Musa, na thuaj publikisht: A ka ndryshuar qëndrimi yt ndaj kësaj qeverie që ti vetë e quaje anti-shqiptare, apo thjesht ke ndryshuar dresin?”, shkruan Uzairi.

Ai kujton mbledhjet e brendshme të Kryesisë së Aleancës, ku sipas tij, Musa kishte qenë një nga zërat më kritikë ndaj qeverisë aktuale.

“Në mbledhjet e Kryesisë së Aleancës nuk leje që të mbaronte diskutimi pa thënë: ‘Duhet të largohemi nga kjo qeveri, nuk na përfaqëson, po na turpëron!’”

Uzairi ngre pikëpyetje të hapura për qëndrimin e ri të Musës dhe reagimin e saj të munguar pas kritikave të fundit që Bashkimi Evropian i ka drejtuar qeverisë për mungesë reformash dhe korrupsion të lartë.

“A është e pranueshme për ty kjo qeveri edhe pasi Bashkimi Evropian e demaskoi si të korruptuar dhe pa reformë?”

Ai mbyll reagimin me një sulm të drejtpërdrejtë ndaj sjelljes politike të Musës, duke e akuzuar për mungesë integriteti.

“Mos i lodh më njerëzit me moral të rremë! Të gjithë po e shohin: kur s’të jepet ajo që kërkon, bëhesh parimore, kur të japin ndonjë kockë, bëhesh e heshtur!”

Kjo përplasje vjen në një periudhë të tensionuar brenda radhëve shqiptare në politikën e Maqedonisë së Veriut. Flaka