ASH Tetovë: Bilall Kasami fyeu Shqipërinë dhe ambasadorin Meidani – kërko falje publike!

Aleanca për Shqiptarët – Dega Tetovë ka reaguar ashpër ndaj deklaratës së kryetarit të Komunës së Tetovës, Bilall Kasami, i cili së fundmi ka cilësuar Republikën e Shqipërisë si një “shtet të dobët për ne”, ndërsa ka sulmuar politikisht ambasadorin shqiptar në Shkup, Denion Meidani.

Në një deklaratë zyrtare, ASH e Tetovës e cilëson këtë gjuhë si fyes dhe të papranueshme, sidomos kur vjen nga një përfaqësues lokal që, sipas tyre, “moti kohë nuk përfaqëson më tetovarët”.

“Kjo gjuhë fyen jo vetëm shtetin shqiptar si një vend aleat i NATO-s dhe partner i Bashkimit Evropian, por edhe dinjitetin e shqiptarëve kudo që ndodhen,” thuhet në reagimin e degës së ASH-së në Tetovë.

ASH nënvizon se Shqipëria ka qenë dhe mbetet mbështetëse e palëkundur e shqiptarëve jashtë kufijve të saj dhe përfaqëson aspiratat për zhvillim, integrim dhe dinjitet kombëtar.

Në deklaratë përmendet edhe pozicionimi i Kasamit brenda qeverisë aktuale të udhëhequr nga VMRO-DPMNE, për të cilën raporti i fundit i Bashkimit Evropian ka shprehur shqetësime për ndikim serbo-rus.

“Derisa Bilall Kasami mbetet mbështetës i interesave të VMRO-së, refuzon emërtimin e rrugëve me figura kombëtare shqiptare, hesht për masakrën e ‘Monopolit’, dhe së fundmi ofendon publikisht Shqipërinë – ai nuk mund të përfaqësojë më vullnetin shqiptar në Tetovë,” thuhet më tej në reagim.

ASH e Tetovës i kërkon Kasamit të tërheqë deklaratat dhe të kërkojë falje publike para çdo qytetari shqiptar.

“Sulmet ndaj ambasadorit Meidani janë sulme ndaj shtetit shqiptar dhe kërkojnë përgjegjësi publike,” përfundon kumtesa.

Aleanca për Shqiptarët – Dega Tetovë ka shprehur gjithashtu mbështetjen e saj të plotë për ambasadorin Denion Meidani, duke e cilësuar si një zë të fuqishëm të interesit shqiptar dhe përfaqësues të denjë të shtetit shqiptar në një periudhë delikate për komunitetin shqiptar në Maqedoninë e Veriut.p